Elektrotexnika sohasi uchun 20 milliard soʻmgacha imtiyozlar beriladi

Qaror bilan elektrotexnika sohasini rivojlantirish, mahalliy xomashyoni chuqur qayta ishlash hamda eksport hajmini oshirish boʻyicha aniq vazifalar belgilandi.

Asosiy maqsadli koʻrsatkichlar 2026 yilda eksport geografiyasini 80 ta davlatga, eksport hajmini esa 3 milliard dollarga yetkazish koʻzda tutilgan. Shuningdek, 2030 yilda mis xomashyosini birja savdolariga chiqarish hajmini 225 ming tonnaga yetkazish koʻzda tutilmoqda.

Eʼtiborli jihati shundaki, 2026-2027 yillarda elektrotexnika sanoati korxonalari aylanma mablagʻlarni toʻldirish, jumladan, mis xomashyosini xarid qilish uchun tijorat banklari orqali kredit olishida qoʻshimcha imtiyozlarga ega boʻladi.

Xususan, milliy valyutadagi kreditlar boʻyicha Markaziy bankning asosiy stavkasidan 4 foiz punkt yuqori, lekin 10 foiz punktdan oshmagan qismida kompensatsiya beriladi.

Shuningdek, xorijiy valyutadagi kreditlar uchun foiz stavkasining 6 foizdan yuqori qismi, biroq 5 foiz punktdan oshmagan miqdorda qoplanadi. 10 milliard soʻmgacha, ammo kreditning 50 foizidan ortiq boʻlmagan qismiga kafillik taqdim etiladi.

Ushbu chora-tadbirlar sohadagi tadbirkorlik subʼektlarini qoʻllab-quvvatlash, ichki qiymat zanjirini kuchaytirish va eksportbop mahsulot ishlab chiqarishni kengaytirishga xizmat qiladi.