FNQZ xodimlari ikki oydan beri oyliksiz ishlayotganini aytishyapti

Fargʻona neftni qayta ishlash zavodida ishchilarga oylik toʻlash bilan bogʻliq kechikishlar boʻlayotgani aytilyapti.

Kun.uz’ga murojaat qilgan FNQZ xodimining aytishicha, ularga 2 oydan beri ish haqlari toʻlanmayapti.

«3 mingdan ortiq ishchi bor, ikki oydan beri bizga oylik berishmayapti. Rahbariyat jim, nima boʻlayotganini hech kim bilmaydi. Aslida maoshlar ham oz, ammo biz oylikni oshirishni emas, uning oʻz vaqtida berilishini soʻrayapmiz xolos», deydi murojaatchi.

Boshqa bir xodim ham yuqoridagi maʼlumotni tasdiqladi va iyun oyidan beri oylik berilmayotganini aytdi.

Kun.uz bogʻlangan FNQZ vakiliga koʻra, maoshlarni berishni boshlash rejalashtirilgan. Kechikishlarga kredit bilan bogʻliq muammo sabab boʻlgani aytilyapti.

Avvalroq FNQZga egalik qiluvchi «Sanoat energetika guruhi» MChJga aloqador Eriell va Enter Engineering kompaniyalari xodimlari ham bir necha marotaba videomurojaat yoʻllab, oylik toʻlash bilan bogʻliq jiddiy muammolar borligini maʼlum qilgandi.

FNQZning xususiylashtirilishi

2022 yilning may oyida «Sanoat energetika guruhi» MChJ (Saneg) FNQZning 100 foiz ulushini ayrim majburiyatlar bilan 100 mln dollarga xususiylashtirib olgandi. Shundan keyin zavod 2023 yilda 469,6 mlrd soʻm, 2024 yilda esa 236,1 mlrd soʻm sof foyda koʻrgan. Ammo hamon FNQZning 58,5 foiz nazorat paketi Davaktiv ixtiyorida qolayotganiga qaraganda, 3 yildan beri kelishilgan pul davlatga toʻliq toʻlanmagan. Bitim qachon yopilishi, toʻlov yana necha yilga choʻzilishi maʼlum emas. Bu vaqtda Saneg zavodning bir qismini 140 mln dollarga sotishga ham erishdi. Saneg’da qarzga olingan zavodni qayta sotish huquqi boʻlgan yoki boʻlmagani maʼlum emas.