Mahalliy byudjet xarajatlari daromaddan oshib ketdi

2025 yil yanvar iyun oylarida Oʻzbekiston mahalliy byudjetlari daromadlari 33,7 trln soʻmni, xarajatlari 48,5 trln soʻmni tashkil etdi.

Toshkent shahrining daromad va xarajatlari respublika boʻyicha eng yuqori darajada qayd etildi. Jumladan, poytaxtning yarim yillik tushumlari 6,8 trln soʻm, chiqimlari 7,3 trln soʻm boʻldi.

Keyingi oʻrinni Toshkent viloyati band qildi. Hudud byudjetiga olti oyda 3,56 trln soʻm daromad, 3,9 trln soʻm xarajatlar qilindi.

Samarqand va Fargʻona viloyatlarining yarim yillik tushumlari 2,9 trln soʻmdan (har biriniki) ortdi. Chiqimlarga kelganda Fargʻona koʻproq—4,7 trln soʻmdan ortiq, Samarqand esa 4,1 trln soʻm sarflagan.

Hududlar kesimida eng kam daromadni Sirdaryo viloyati topgan—885 mlrd soʻm. Uning xarajatlari esa 1,96 trln soʻmdan ortiqni tashkil qilgan. Oʻz navbatida daromadlari sezilarli kam hududlar — Jizzax (1,1 trln soʻm) Xorazm (1,6 trln soʻm), Surxondaryo (1,7 trln soʻm), Navoiy (1,7 trln soʻm) viloyatlari boʻlgan.

Olti oylik raqamlarga koʻra, byudjeti taqchilligi eng yirik hudud Fargʻona viloyati boʻldi — 1,8 trln soʻm. Viloyat byudjetiga kamomadni yopish uchun respublika byudjetidan 1,1 trln soʻm transfert mablagʻlari oʻtkazilgan. Bu boshqa hududlarga qaraganda eng koʻp oʻtkazma hisoblanadi.

Byudjeti taqchilligi nisbatan yuqori hududlar Samarqand (1,6 trln soʻm), Andijon (1,5 trln soʻm), Namangan (1,36 trln soʻm) viloyatlari hamda Qoraqalpogʻiston Respublikasi (1,4 trln soʻm) boʻlgan. Daromad va xarajatlar oʻrtasidagi eng kam tafovut Navoiy viloyati byudjetida qayd etilgan — 279 mlrd soʻm.

Shuningdek, Toshkent viloyati (365 mlrd soʻm) va Toshkent shahri (527 mlrd soʻm) byudjet kamomadlari qolgan hududlardagiga nisbatan kamroq boʻlgan.