OKMKda yana bir texnologik raqamli podstansiya barpo etilmoqda

Olmaliq kon-metallurgiya kombinatida amalga oshirilayotgan “Yoshlik-1” konini oʻzlashtirish loyihasi doirasida kon va uning texnika majmuasini tashqi elektr energiyasi bilan taʼminlash maqsadida yana bir zamonaviy raqamlashtirilgan texnologik podstansiya barpo etilmoqda.

Mutaxassislarga koʻra, ushbu podstansiya 110/35/6 kV kuchlanishga ega boʻlib, bu yerga elektr energiyasi “Qoraqiyasoy” va “Adolat” podstansiyalaridan havo liniyalar orqali uzatiladi. Podstansiyada 2 ta quvvati 63 MVA boʻlgan zamonaviy transformatorlar oʻrnatilgan boʻlib, ular yordamida 110 kV elektr energiyasi 35,6 kV kuchlanishga pasaytirilib, “Yoshlik-1” konidagi kon-texnika majmuasini uzluksiz va sifatli elektr energiyasi bilan taʼminlab beradi.

Bundan tashqari, podstansiyaga quyosh foto elektr stansiyasi ham oʻrnatilgan boʻlib, quvvati 30 kVt boʻlgan quyosh panellari mazkur obʼektning elektr energiyasiga boʻlgan ehtiyojini toʻliq qondiradi va elektr tejamkorligini taʼminlaydi. Shuningdek, ushbu obʼektga xorijiy ishlab chiqaruvchilar hamda elektr energetikasining yirik gigantlarining 6,35 va 110 kVli oʻchirgichlari, tok va kuchlanishli transformatorlari oʻrnatildi.

Podstansiya avtomatika va rele himoyali bloklari, avariyaga qarshi avtomatika, avtomatlashtirilgan masofaviy boshqaruv tizimi, maʼlumotlarni yigʻish va uzatish dispetcherlik boshqaruv tizimi bilan jihozlandi.

Podstansiyaning barcha metall konstruksiyalari va beton buyumlari mahalliy ishlab chiqaruvchilar tomonidan ishlab chiqarilgan. Mazkur obʼektda bugungi kunda pudrat tashkiloti tomonidan qurilish-montaj ishlari qizgʻin pallada. Uskunalarni sinovdan oʻtkazish va ishga tushirish ishlari davom ettirilmoqda.