“Oʻzbekgidroenergo” AJ GESlar sonini 100 dan oshirishni rejalashtirmoqda (+video)

Yangi Oʻzbekiston taraqqiyot strategiyasi doirasida qayta tiklanuvchi energiya manbalarini kengaytirish, elektr energiyasini uzluksiz yetkazib berish va ishlab chiqarishni zamonaviy texnologiyalar asosida oshirish boʻyicha izchil islohotlar amalga oshirilmoqda.

Shu islohotlar doirasida olib borilayotgan ishlar “Oʻzbekgidroenergo” aksiyadorlik jamiyati misolida ham oʻz ifodasini topmoqda.   

Mazkur tashkilotda oʻtkazilgan matbuot anjumanida maʼlum qilinishicha, 2025 yilning birinchi yarim yilligida “Oʻzbekgidroenergo” tomonidan 3,6 milliard kilovatt-soat elektr energiyasi ishlab chiqarilgan.   

Jamiyat tashkil topgan 2017 yildan bugungi kunga qadar 450 megavattlik qoʻshimcha quvvatlar ishga tushirilgan. Bugungi kunda korxona tarkibidagi umumiy gidroelektr stansiyalari sonini 100 dan oshirish rejalashtirilgan boʻlib, bu borada yangi qurilayotgan kichik, mikro va mobil GESlar muhim ahamiyat kasb etmoqda.   

Tashkilot 2025 yil yakuniga qadar 405 million dollarlik investitsiya mablagʻlari hisobidan 32 ta loyihani amalga oshirishni maqsad qilgan. Ushbu loyihalar tufayli 912 million kilovatt-soat qoʻshimcha elektr energiyasi ishlab chiqarilishi kutilmoqda.   

Shuningdek, 2025-2026 yillarda Xitoy Xalq Respublikasining begʻaraz yordami asosida umumiy quvvati 20 megavatt boʻlgan 4 ta shamol elektr stansiyasi qurilishi ham koʻzda tutilgan.   

Anjumanda qayd etilganidek, gidroenergetika salohiyatini yanada oshirish maqsadida “Loyihalar fabrikasi” faoliyati yoʻlga qoʻyilgan boʻlib, xorijiy investorlar uchun tayyor loyihalar shakllantirilgan. Bu esa mamlakat energetika xavfsizligi va barqaror taraqqiyotini taʼminlashda muhim ahamiyatga ega.