Oʻzbekiston bank aktivlari 863 trln soʻmga yetdi

Markaziy bank axborotiga koʻra, banklar tomonidan berilgan kreditlar hajmi 581,1 trln soʻmga yetdi. Bu oʻtgan yilning shu davriga nisbatan 14 foiz koʻp. Real oʻsish 15 foizni tashkil qildi. Shunga qoʻshimcha ravishda, aholi va korxonalarning depozitlari 363,7 trln soʻmga yetdi. Bu koʻrsatkich 28 foiz nominal, 29 foiz real oʻsishni namoyon etdi.

Sektorning jami kapitali 128,8 trln soʻmga yetgan boʻlib, yil davomida 21 foizga oshgani qayd etildi. Bu esa bank tizimi barqarorligini taʼminlaydigan muhim omil sifatida baholanmoqda. Eng yirik ulush davlatga qarashli tijorat banklari hissasiga toʻgʻri kelib, ularning umumiy ulushi 65 foizni tashkil etmoqda.

Aktivlar boʻyicha yetakchi banklar qatorida Milliy bank — 143,96 trln soʻm bilan birinchi oʻrinda turibdi. Undan keyingi oʻrinlarda Agrobank (100,51 trln soʻm), Sanooat-qurilish bank (97,03 trln soʻm), Asakabank (60,15 trln soʻm) va Kapitalbank (52,28 trln soʻm) qayd etilgan.

Kreditlar hajmi boʻyicha ham Milliy bank — 105,6 trln soʻm bilan yetakchilik qilmoqda. Shuningdek, Agrobank (75,94 trln soʻm), Sanoat-qurilish bank (67,99 trln soʻm), Asakabank (40,5 trln soʻm) va Ipoteka bank (35,64 trln soʻm) yirik koʻrsatkichlarga ega. Depozitlar boʻyicha esa Milliy bank (48,41 trln soʻm), Kapitalbank (40,05 trln soʻm) va Agrobank (26,81 trln soʻm) kuchli uchlikka kirgan.

Kapital darajasi boʻyicha yetakchilar ham shu banklar hisoblanib, Milliy bank — 19,35 trln soʻm bilan birinchi oʻrinda. Undan keyin Agrobank (13,72 trln soʻm), Sanoat-qurilish bank (11,2 trln soʻm), Xalq bank (10,12 trln soʻm) va Ipoteka bank (7,13 trln soʻm) qayd etilgan.