Oʻzbekiston – Malayziya: 5 milliard dollarlik loyihalarni amalga oshirish rejalashtirilmoqda

Maqolada Kuala-Lumpur shahrida Oʻzbekiston davlat mustaqilligining 34 yilligi munosabati bilan oʻtkazilgan qabul marosimi tafsilotlari qalamga olingan, deb xabar bermoqda "Dunyo" AA muxbiri.

"Elchi Karomiddin Gadoyev Malayziya 1991 yilda Oʻzbekiston mustaqilligini tan olgan birinchi davlatlardan biri boʻlganini, ikki davlat oʻrtasidagi diplomatik munosabatlar 1992 yil 21 yanvarda oʻrnatilganini taʼkidladi, – deyilgan nashrda. – Davlatlar oʻrtasidagi munosabatlar 5 milliard AQSh dollaridan ortiq qiymatga ega boʻlgan qoʻshma loyihalar va yuqori darajadagi faol aloqalar bilan yangi darajaga koʻtarilmoqda".

Oʻzbekiston rasmiy vakili, shuningdek, ikki davlat rahbarlari oʻrtasidagi oliy darajadagi muloqot va parlamentlararo almashinuvlar sezilarli dinamikaga ega boʻlganini qayd etdi.

Nashrda maʼlum qilinganidek, 2024 yil may oyida 16 yillik tanaffusdan soʻng Malayziya Bosh vaziri Anvar Ibrohim Oʻzbekistonga tashrif buyurdi. 2025 yil fevral oyida Oʻzbekiston prezidenti Shavkat Mirziyoyevning Malayziyaga tashrifi amalga oshirildi. Bu Oʻzbekiston prezidentining yigirma yil ichida Malayziyaga birinchi tashrifi boʻldi.

"Mazkur tarixiy tashriflar va erishilgan kelishuvlar ikki mamlakat munosabatlarida yangi sahifa ochdi", – deyilgan nashrda.

Maqolada Oʻzbekiston va Malayziya oʻrtasidagi savdo va investitsiyalarning barqaror oʻsishi alohida qayd etilgan.

Material yakunida "Hozirgi kunda Oʻzbekistonda malayziyalik hamkorlar bilan 5 milliard AQSh dollaridan ortiq qiymatga ega boʻlgan 40 dan ortiq loyihani amalga oshirish rejalashtirilgan", – deya urgʻulangan.