Oʻzbekistonda ilk adsorberlar ishlab chiqarilmoqda

Oʻzbekistonda birinchi marta “Oʻzbekkimyomash” zavodida xalqaro standartlarga mos adsorberlar ishlab chiqarish yoʻlga qoʻyildi. 

Ushbu qurilma zavodlarda tabiiy gazni tozalashda muhim ahamiyatga ega boʻlib, ilk mahsulot Shoʻrtan neft-gaz qazib chiqarish boshqarmasiga yetkazib berildi. 

Loyiha mahalliylashtirish dasturi doirasida amalga oshirilayotgan boʻlib, bu nafaqat ichki talabni toplashga, balki eksport imkoniyatlarini kengaytirishga ham xizmat qiladi

Adsorber – tabiiy gazni oltingugurt birikmalaridan tozalashda ishlatiladi. Ular diametri 3 metr, devorining qalinligi 100 mm va uzunligi 19 metr boʻlgan ulkan kolonna boʻlib, 63 atmosfera bosimiga bardosh beradi. Ushbu gigant qurilmaning vazni 147 tonnani tashkil qiladi va u 09G2S-12 GOST 5520-17 standartiga muvofiq yuqori sifatli poʻlatdan tayyorlanmoqda.

Adsorbsiya jarayoni uch bosqichda amalga oshiriladi:

Adsorbsiya: gazni tozalash.

Regeneratsiya: tozalovchi moddalarni qayta tiklash.

Sovutish: qurilmani keyingi siklga tayyorlash.

Mahalliy ishlab chiqarilgan adsorberlar tabiiy gaz tarkibidagi oltingugurt birikmalarini tozalash samaradorligi va xizmat qilish muddati yuqori boʻlib, yana 8 ta qurilma Shoʻrtan neft-gaz qazib chiqarish boshqarmasiga yetkazib beriladi.

Adsorberlar oldin xorijdan olib kelingan boʻlib, mahalliylashtirish dasturi doirasida Oʻzbekistonda ishlab chiqarilishi ularning tannarxini ikki barobar arzonlashtirish imkonini berdi.

Yana bir ahamiyatli jihati shundaki, ushbu mahalliylashtirish dasturi doirasida “Oʻzbekkimyomash” zavodida 1200 nafardan ortiq malakali mutaxassislar ish bilan taʼminlandi.

Maʼlumot uchun: Zavod yiliga 20 taga yaqin adsorber ishlab chiqarish imkoniyatiga ega boʻlib, bu nafaqat ichki talabni toʻliq qondirish, balki eksportni kengaytirish orqali mamlakatimizning xalqaro bozordagi raqobatbardoshligini oshirishga, yurtimizda sanoatni rivojlantirish, iqtisodiyotni mustahkamlash va texnologik mustaqillikka erishishda muhim qadam boʻlib hizmat qiladi.