Oʻzbekistonga guruch asosan qaysi davlatdan import qilinadi?

Milliy statistika qoʻmitasi maʼlumotlariga koʻra, 2025 yilning yanvar-iyul oylarida Oʻzbekiston 13 ta davlatdan qiymati 2,9 million AQSh dollariga teng boʻlgan 6,5 ming tonna guruch import qilgan. 

4,3 ming tonna mahsulot Qozogʻistondan keltirilgan. Geografik yaqinlik, logistika qulayligi va savdo aloqalarining mustahkamligi bu natijaning asosiy sabablaridan. 

Hindiston guruch eksportida dunyo yetakchilari qatoridan joy olgan davlat sifatida Oʻzbekistonga 1,1 ming tonna guruch yetkazib bergan. Pokistondan esa 186 tonna guruch import qilingan. Bu esa dunyoda yetishtirilayotgan guruchlarning eng yaxshi turlari mamlakatimiz bozorlariga kirib kelayotganidan dalolat beradi.

Qirgʻiziston 582 tonna guruch bilan Oʻzbekiston bozorida sezilarli rol oʻynagan. Bu geografik yaqinlik va bojxona-soliq tizimidagi yengilliklar evaziga deyish mumkin. Xitoy esa yuqoridagi davlatlarga nisbatan kam (66 tonna) hajmda guruch yetkazib bergan.

Oʻzbekistonda ham guruch yetishtiriladi, ammo iqlim oʻzgarishlari, suv resurslarining cheklanishi, ekin maydonlarining qisqarishi kabi omillar guruch hosildorligiga taʼsir koʻrsatmoqda. Shu sababli, import muqobil yechim sifatida qaraladi.