Yangi versiyadagi Cobalt uchun onlayn kontraktatsiya 3 noyabr kuni ochiladi

Yangilangan Chevrolet Cobalt avtomobillari uchun onlayn kontraktatsiya 3 noyabr soat 10:00 dan boshlab ochiladi. Bu haqda UzAuto Motors xabar qildi.

«Chevrolet Cobalt avtomobillariga boʻlgan yuqori talab va mijozlardan kelib tushayotgan koʻplab soʻrovlarni inobatga olgan holda, shuningdek, ortiqcha ajiotajning oldini olish maqsadida, UzAuto Motors Chevrolet Cobalt avtomobillariga kontraktatsiya jarayoni onlayn tarzda amalga oshirilishini maʼlum qiladi. Onlayn shartnoma tuzish jarayonida Chevrolet Cobalt avtomobillarining barcha komplektatsiyalari, shu jumladan ikkita yangi komplektatsiya ham mavjud boʻladi», — deyiladi kompaniya xabarida.

Savdo faqat uzavtosavdo.uz sayti hamda UzAvtoSavdo ilovasi orqali amalga oshiriladi. 3 noyabr kuni barcha Chevrolet dilerlik markazlari yopiladi va UzAuto Motors savdo tizimidan uziladi.

Onlayn platforma orqali tuzilgan shartnomalarda maxsus QR kod mavjud boʻlib, u shartnomaning haqiqiyligini tasdiqlaydi. Bunday QR kodga ega boʻlmagan shartnomalarga UzAuto Motors va Chevrolet rasmiy dilerlari aloqador emas. Kompaniya mijozlardan diqqatli boʻlishni va shartnoma tuzishda doimo ushbu QR kod mavjudligini tekshirishni soʻradi.