Yaponiya Oʻzbekistonda quriladigan aeroportga 1 mlrd dollar investitsiya kiritadi

Unda qayd etilishicha, Sojitz kompaniyasi bu yil Oʻzbekiston poytaxtida Toshkent shahrida yangi xalqaro aeroport qurishni boshlaydi. Mazkur loyiha kompaniyaning 1 milliard dollarlik infratuzilma investitsiyalari doirasida amalga oshiriladi.

Toshkentdagi aeroport Saudiya Arabistonining Vision Invest kompaniyasi bilan davlat-xususiy sheriklik asosida quriladi. Sojitz loyihaga bir necha oʻn milliard iyena, yaʼni yuzlab million dollar investitsiya kiritishni rejalashtirmoqda. Shu kunga qadar kompaniya Yaponiyaning Kumamoto va Okinava prefekturalarida hamda Palau orollaridagi xalqaro aeroportlar loyihalarida ishtirok etgan.

"Oʻzbekiston yangi aeroport loyihasini 2025 yil avgust oyida tasdiqladi. Loyihaga koʻra, 2028 yilda ochilishi rejalashtirilgan bu aeroport yiliga 20 million yoʻlovchini qabul qilishi va soatiga 40dan ortiq uchish-qoʻnish harakatlarini amalga oshirishi mumkin. Bu uni Markaziy Osiyoning eng yirik aeroportiga aylantiradi", – deb yozilgan maqolada.

Sojitz shuningdek, Oʻzbekistonda boshqa infratuzilma loyihalarida ham ishtirok etishni rejalashtirmoqda. Ular Samarqandda Ronesans International turk kompaniyasi bilan hamkorlikda 800 oʻrinli yirik kasalxona, 1 gigavatt quvvatga ega shamol elektr stansiyasi va 1,6 GVt quvvatga ega issiqlik elektrostansiyasini qurishni rejalashtirmoqda.

Nashrda maʼlum qilinganidek, Oʻzbekiston 37 million aholisi bilan mintaqada eng katta davlat sanaladi va ichki umumiy mahsulotning yillik oʻsishi 6 foizdan yuqori. Chet el investitsiyalari uchun soliq imtiyozlari va boshqa ragʻbatlar mavjud, korporativ soliq stavkasi esa 15 foiz.

"2024 yil oktabr holatiga koʻra, Oʻzbekistonda 54 ta yapon kompaniyasi faoliyat yuritadi, bu 2019 yil koʻrsatkichidan ikki barobar koʻp. Sojitz kompaniyasi iyun oyida Toshkentda ilk bor rasmiy ofisini ochdi", – deyilgan nashrda.

Nashrda maʼlum qilinishicha, Yaponiya boshqa kompaniyalari ham Oʻzbekistonda infratuzilma sohasida faoliyat yuritmoqda. "Masalan, Toyota Tsusho oʻz boʻlinmasi Eurus Energy Holdings orqali 500 megavattlik shamol elektr stansiyasi loyihasi uchun maydonni oʻrganmoqda va NEC bilan hamkorlikda data markazlari qurish boʻyicha shartnoma imzoladi. Marubeni BAA kompaniyasi bilan hamkorlikda chiqindi suvlarni tozalash zavodini qurmoqda", – deyilgan manbada.

Nikkei Asia nashrida eʼlon qilingan maqolada "Oʻzbekiston Yaponiya Iqtisodiyot, cavdo va canoat vazirligi bilan mineral resurslar, ayniqsa strategik ahamiyatga ega boʻlgan minerallarni qazib olish hamkorligini kengaytirish boʻyicha muzokara olib bormoqda", – deya Oʻzbekiston investitsiyalar, sanoat va savdo vaziri Laziz Qudratov fikrlaridan iqtibos keltirilgan.