Jeffri Epshteyn ishi: asosiy voqealar va yangi oshkoralik

2008 yili Epshteyn Florida shtatdagi ish boʻyicha sud bilan kelishuvga borib, yengil jazo olgan. Bu qaror keyinchalik jamoatchilik va huquq faollari tomonidan keskin tanqid qilindi, chunki u keng qamrovli jinoyatlardan amalda qutulib qolgani aytildi.

2019 yili Epshteyn Nyu-Yorkda odam savdosi va jinsiy ekspluatatsiya bilan bogʻliq federal ayblovlar asosida qayta hibsga olindi. Tergov materiallarida u turli mamlakatlardan boʻlgan qizlarni moliyaviy va maishiy yordam orqali oʻziga bogʻlab qoʻygani qayd etilgan.

2019 yil avgust oyida Epshteyn qamoqxonada oʻlik holda topildi. Rasmiy xulosada oʻlim sababi oʻz joniga qasd qilish deb koʻrsatilgan boʻlsa-da, bu holat jamoatchilik orasida koʻplab savollar va shubhalarni keltirib chiqardi.

Keyingi yillarda sud materiallari va tergov hujjatlari bosqichma-bosqich oshkor qilinmoqda. Ularda Epshteyn bilan aloqada boʻlgan shaxslar, moliyaviy oʻtkazmalar va yozishmalar aks etgan.

Samarqandlik qiz bilan bogʻliq yozishmalar

Ommaviy axborot vositalariga sizib chiqqan navbatdagi hujjatlarda Epshteynning Samarqand viloyatidan boʻlgan qiz bilan yozishmalari ham tilga olinadi. Hujjatlarga koʻra, u qizning Parijdagi taʼlimi, turar joyi, aviachiptalari va boshqa xarajatlarini qoplab bergan.

Shuningdek, Oʻzbekistondagi bank hisob raqamiga 5400 AQSh dollari oʻtkazib berilgani qayd etilgan. Yozishmalar mazmuni va moliyaviy harakatlar Epshteynning turli davlatlardan boʻlgan yosh ayollarni moliyaviy jihatdan qaram qilib qoʻyish amaliyoti mavjud boʻlgani haqidagi daʼvolarni yana bir bor kuchaytirmoqda.