Kaspiydagi fojiadan soʻng Qozogʻiston mudofaa vaziri ishdan olindi

27-sentyabr kuni Qozogʻiston prezidenti Qosim-Jomart Toʻqayev Dauren Kosanovni mamlakat mudofaa vaziri lavozimidan ozod qildi. Tegishli farmon davlat rahbarining rasmiy resurslarida eʼlon qilingani xabar qilindi.

Kosanov mudofaa vaziri lavozimiga 2025-yil 8-iyunda tayinlangan. 2026-yil sentyabr oyi boshida esa yangi hukumat tarkibi shakllantirilganidan soʻng ushbu lavozimga qayta tayinlangan edi.

Shuningdek, prezident farmoni bilan Aydos Sakenovich Mirzaxmetov Qozogʻiston mudofaa vaziri etib tayinlangan. Kosanovning lavozimdan ozod etilishi Kaspiy dengizidagi harbiy mashgʻulotlar vaqtida 14 nafar harbiy halok boʻlganidan bir necha kun oʻtib sodir boʻldi.

24-sentyabr kuni Mangʻistau viloyatida oʻtkazilgan «Xazar qorgʻoni — 2026» mashgʻulotlari vaqtida harbiy xizmatchilar «Qaysar» kateridan qirgʻoqqa tushirilayotganda dengizga oqib ketgan.

Jami 17 nafar harbiy xizmatchi suvga tushib ketgan, uch nafari qutqarilgan, 14 nafari halok boʻlgani haqida xabar qilgan edik. Harbiylar qirgʻoqqa tushirilayotgan paytda ob-havo sharoiti keskin yomonlashgani va shamol kuchaygani xabar qilingan.

Hodisa yuzasidan Qozogʻiston Jinoyat kodeksining 453-moddasi 2-qismi va 465-moddasi boʻyicha jinoyat ishi qoʻzgʻatilgan. 25-sentyabr kuni mamlakatda milliy motam kuni deb eʼlon qilingan.

Hodisa ortidan Mudofaa vazirligining besh nafar mansabdori qoʻlga olingan. Ular orasida Qurolli kuchlar Harbiy-dengiz kuchlari bosh qoʻmondonining birinchi oʻrinbosari — shtab boshligʻi, ikki harbiy qism komandiri, dengiz piyodalari rotasi komandiri hamda kater komandiri bor.

Toʻqayev, shuningdek, mudofaa idorasidagi holatni har tomonlama tekshirish uchun maxsus komissiya tuzishni topshirgan. Kaspiyda halok boʻlgan harbiy xizmatchilar davlat mukofotlariga taqdim etilgan.

Tergov doirasida besh mansabdorga nisbatan koʻrilgan choralar hodisa boʻyicha qabul qilingan javob choralarining bir qismi sifatida qayd etilgan.