Maymunchechak virusi Yevropaga yetib bordi

Maʼlumotlariga koʻra, Shvetsiyada kasallikka chalingan odam maymunchechak virusining eng koʻp tarqalgan "Clade 1" turini Afrika hududida boʻlganida yuqtirib olgan. Bu xabar Jahon sogʻliqni saqlash tashkiloti (JSST) tomonidan favqulodda holat eʼlon qilganidan bir necha soat oʻtgach tarqalgan. 

Shvetsiya sogʻliqni saqlash agentligi rahbari vazifasini bajaruvchi Oliviya Vigzellning soʻzlariga koʻra, virusni yuqtirgan shaxs dastlab Stokgolm hududidagi tibbiy yordamga murojaat qilgan. Bemordagi yuqori harorat va teridagi oʻzgarishlar virusning ilk alomatlaridan dalolat bergan. Shundan soʻng bemor darhol kuchaytirilgan davolash palatasiga oʻtkazilgan. 

Maʼlumot uchun, oʻtgan yilning sentabr oyida aniqlangan virus oqibatida birgina Kongo Demokratik Respublikasi hududida kamida 450 kishi halok boʻlgandi. Kasallik keyinchalik Markaziy va Sharqiy Afrika tomonlarga ham ildiz yoygan. Hozirda virus aniqlangan har 100 holatdan toʻrttasi oʻlim bilan yakunlanmoqda. Ilgari "M-pox" nomi bilan maʼlum boʻlgan maymunchechak virusi asosan jinsiy aloqa, teriga teginish va boshqa odam bilan yaqin gaplashish yoki nafas olish kabi yaqin aloqa orqali yuqishi aytib oʻtilmoqda. Isitma, bosh ogʻrigʻi, teridagi turli toshmalar va mushaklardagi kuchli ogʻriqlar kasallikning asosiy belgilari hisoblanadi.