Tramp FQBning sobiq direktoriga ayblov qoʻyilganini maʼlum qildi

Bu haqda AQSh prezidenti Donald Tramp ijtimoiy tarmoqdagi sahifasida maʼlum qildi. Oq uy rahbari Komini yana bir bor keskin tanqid qilib, uni «Amerika tarixidagi eng yoqimsiz shaxslardan biri» deb atadi hamda «davlatga qarshi jinoyatlari uchun javob berishi kerak», deya taʼkidladi.

«Bugun katta hakamlar hayʼati uning noqonuniy va notoʻgʻri harakatlari uchun ikki ogʻir modda boʻyicha ayblov eʼlon qildi», — dedi Tramp.

AQSh bosh prokurori Pem Bondi esa ijtimoiy tarmoqdagi izohida qonun hamma uchun barobar ekanini taʼkidlab: «Bugungi ayblov Adliya vazirligining oʻz vakolatidan suiisteʼmol qilgan va xalqni adashtirgan shaxslarni javobgarlikka tortishga qatʼiy intilishini koʻrsatmoqda», — dedi.

21 sentabr kuni Tramp prokuror Bondini ochiqchasiga Komiga chora koʻrishga chaqirgan edi. Axios nashri maʼlumoticha, Komiga Kongressga yolgʻon koʻrsatma berish va «Rossiya ishi» boʻyicha Kongress tergoviga toʻsqinlik qilish ayblovlari qoʻyilgan.

«Rossiya izi» boʻyicha tergov

2017 yilda Rossiyaning goʻyoki AQSh saylovlariga Tramp manfaati yoʻlida aralashgani haqidagi iddaolar fonida maxsus prokuror sifatida Robert Myuller tayinlangan edi. Uning vazifasi Trampning saylovoldi shtabi faoliyatini oʻrganishdan iborat boʻldi. Qariyb ikki yarim yillik tergovdan soʻng Trampning aybdorligiga doir dalillar topilmadi va ish yopildi.

Keyinroq AQSh Adliya vazirligi Jon Daremni «Rossiya tergovi»ning kelib chiqishini oʻrganish uchun maxsus prokuror etib tayinladi. Uning ishi davomida ikki kishi Trampni ayblash maqsadida dalillar bilan manipulyatsiya qilganini tan oldi. Shuningdek, tergov asosini tashkil etgan «Stiil dosesi» demokratik partiya tomonidan moliyalashtirilgani maʼlum boʻldi.