Yahudiylarga o‘lim bilan tahdid qilgan erkak qamaldi

Politsiyaning ma’lum qilishicha, 36 yoshli Tavius Jan-Sharl 2025-yil oktyabridan 2026-yil martigacha bo‘lgan vaqt oralig‘ida olti kishiga bir necha bor tahdid qilgan.

Voqealar London shimolidagi yirik yahudiy jamoasi istiqomat qiluvchi hududdagi sinagogalar yaqinida sodir bo‘lgan.

16-mart kuni uning o‘lim bilan tahdid qilib baqirayotgani haqida politsiyaga xabar berilgan. Natijada hibsga olinadi. Keyinroq  garov evaziga ozod etiladi.

Ammo politsiya qo‘yib yuborganidan ko‘p o‘tmay telefonda “Ularning maktablaridan birini portlatib yuborsak, zo‘r bo‘lardi”, - degani eshitilgan.

O‘tgan oy u irqiy adovat sababli jamoat tartibini buzish bo‘yicha yettita va irqiy adovat asosida mulkka shikast yetkazish bo‘yicha bitta ayblovga iqror bo‘lgandi. 

Juma kuni Sautuork qirollik sudida Jan-Sharl besh yilga ozodlikdan mahrum etildi.

So‘nggi oylarda Londonda bir qator antisemitik hujumlar kuzatildi, jumladan, ikki yahudiy erkak pichoqlandi va ko‘plab o‘t qo‘yish holatlari sodir etildi.

Bundan tashqari, mart oyi oxiridan buyon London bo‘ylab politsiya xodimlari nafratga asoslangan jinoyatlar yuzasidan 90 dan ortiq shaxsni hibsga oldi. Ulardan 70 dan ortig‘i antisemitizm bilan bog‘liq huquqbuzarliklar uchun qo‘lga olingan.

Prokuratura ayblov qarorlarini darhol chiqarish va dalillarni tezroq to‘plash orqali huquqbuzarlarni zudlik bilan javobgarlikka tortishga va’da berdi.