Kanadalik xonanda Devid Keroll oʻzbekistonliklarga murojaat bilan chiqdi

“Aybi” oʻzbekistonlik boʻlgan Suhrob Ubaydullayevni samolyotga chiqarmagan Vengriyaning Wizz Air loukasteri haqida Don’t Fly Wizzness Class qoʻshigʻini kuylagan kanadalik xonanda Devid Keroll ushbu taronani har tomonlama qoʻllab-quvvatlashni soʻrab instagram sahifasi orqali murojaat bilan chiqdi.

“Biz oʻz ovozimiz orqali Wizz Air kompaniyasining Suxrob va sizning mamlakatingizdan yana uch kishiga qilgan hurmatsizligi haqida hikoya qilmoqdamiz. Bir necha yil avval ularga samolyotga chiqishga ruxsat berishmadi va bunga yagona sabab ularning oʻzbekistondan boʻlganidek tuyuldi. Bu esa adolatdan emas.

Suxrob siz va boshqa odamlar, boshqa yoʻlovchilar uchun oʻz huquqini himoya qilmoqda, toki ular ham xuddi uning boshidan oʻtgan noxush tajribani boshdan kechirmasinlar. Siz esa unga yordam bera olasiz — videoni ulashish, yoqtirish va muhabbat bilan qoʻllab-quvvatlash orqali. Shuning uchun, iltimos, shu ishni davom ettiring”, deydi xonanda.

Eslatib oʻtamiz, WizzAir kompaniyasi 2023 yil avgustida Rimdagi aeroportda Suhrob Ubaydullayev va yana uch nafar oʻzbekistonlikni samolyot bortiga chiqarmagan. Natijada Abu Dabi orqali tranzit bilan uchayotgan talabaning chiptalari kuyib ketgan, bir hafta yurtma-yurt sarson boʻlib, qarzga botgan holda arang uyiga yetib kelgan.

Aviakompaniya oʻzbekistonlik yigitni bortga besabab chiqarmagani yetmagandek, pulini ham qaytarib bermagan.
Ushbu qoʻshiq eʼlon qilinganidan soʻng boshqa oʻzbekistonliklar ham xuddi shu aviakompaniya oʻzlarini bortga chiqarmaganini taʼkidlab, shikoyat qilgan. Qoʻshiq 3 kun ichida endigina 40 ming marta koʻrildi.

Devid Keroll  2008 yili “United airlines” aviakompaniyasi qimmat ($3500) gitarasini sindirib, tovon toʻlab bermagani uchun bu haqda qoʻshiq yozib, “Yutub”ga chiqargan va kompaniyaning 180 million dollar zarar koʻrishiga sababchi boʻlgan. Uning ushbu ishi jahon aviatsiyasida mijozlar bilan ishlash strategiyasining tubdan oʻzgarishiga sabab boʻlgan.

Oʻzbekiston aviatsiya hukumati yoki boshqa rasmiy vakillardan mazkur holat boʻyicha hozircha hech qanday izoh berilgani yoʻq.