«Oskar–2026»: eng yaxshi film uchun asosiy daʼvogar aniq

2026 yilgi «Oskar» esa alohida eʼtiborga loyiq, chunki tarixiy rekord yangilanadi.

Nomzodlar Beverli-Hillzdagi Semyuel Goldvin teatrida boʻlib oʻtgan marosimda eʼlon qilindi. Tadbirni aktyorlar Deniyel Bruks va Lyuis Pullman olib bordi. Jami 24 ta nominatsiya boʻyicha daʼvogarlar maʼlum qilindi.

«Oskar» tarixida yangi rekord

Rayan Kugler suratga olgan «Gunohkorlar» nomli vampir dramasi 16 ta nominatsiya bilan «Oskar» tarixida eng koʻp nomzod koʻrsatilgan filmga aylandi. Shu paytgacha rekord 14 ta nominatsiya bilan «Hamma Yeva haqida», «Titanik» va «La-La Land» filmlariga tegishli edi.

«Gunohkorlar» «Eng yaxshi film», «Eng yaxshi rejissyor», «Eng yaxshi aktyor» (Maykl B. Jordan), «Eng yaxshi original ssenariy» hamda bir qator texnik yoʻnalishlarda nomzod sifatida koʻrsatildi.

Yetakchi filmlar va studiyalar

13 ta nominatsiya bilan Pol Tomas Andersonning «Jang ortidan jang» filmi ikkinchi oʻrinda bormoqda. Warner Bros. studiyasi esa jami 30 dan ortiq nominatsiya bilan oʻz tarixidagi eng muvaffaqiyatli mavsumlardan birini qayd etdi.

Shuningdek, «Frankenshteyn», «Marty Supreme» va «Sentimentalnaya sennost» filmlari 9 tadan nominatsiyaga ega boʻldi. NEON mustaqil studiyasi esa «Eng yaxshi xalqaro film» yoʻnalishida 5 ta oʻrindan 4 tasini egallab, diqqat markazida boʻldi.

Eng yaxshi aktyor va aktrisa uchun kurash

«Eng yaxshi aktyor» nominatsiyasida Timoti Shalame, Leonardo Di Kaprio, Maykl B. Jordan, Itan Xouk va Vagner Moura oʻrtasida kuchli raqobat kutilmoqda.

«Eng yaxshi aktrisa» nominatsiyasida esa Jessi Bakli, Rouz Birn, Keyt Hadson, Renata Reynsve va Emma Stoun nomzod sifatida koʻrsatilgan.

73 yoshli britan aktyori Delroy Lindo oʻz faoliyatida ilk bor «Oskar» nominatsiyasiga loyiq koʻrildi.

Yangi nominatsiya va oʻzgarishlar

2026 yilgi marosimda 2001 yildan beri ilk bor yangi — «Eng yaxshi kasting» nominatsiyasi joriy etildi. Shuningdek, ovoz berish tizimiga ham oʻzgartish kiritildi: endi akademiya aʼzolari ovoz berishdan oldin barcha nomzod filmlarni koʻrganini maxsus ilova orqali tasdiqlashi shart.

Nomzodsiz qolganlar

Bu yilgi eng katta syurprizlardan biri «Wicked: For Good» filmining umuman nominatsiya olmagani boʻldi. Shuningdek, rejissyor Gilermo del Toro, aktyorlar Pol Meskal va Cheyz Infiniti ham roʻyxatdan chetda qoldi.

Marosim qachon oʻtadi?

98-«Oskar» mukofotini topshirish marosimi 2026 yil 15 mart kuni Los-Anjelesdagi Dolby teatrida boʻlib oʻtadi. Kechani mashhur komik Konan O’Brayen olib boradi. Marosim ABC telekanali va Hulu platformasida jonli efirda namoyish etiladi.