Makka va Madinada qushlarga don sochganlar katta miqdorda jarimaga tortiladi

Mazkur taqiqqa atrof-muhitning ifloslanishi sabab qilib koʻrsatildi – kabutarlarning koʻpayishi joylarning ifloslanishi, salomatlikka xavf tugʻilishi, svetofor atrofida odamlar toʻplanib qolishi, mashinalar toʻxtashi va yoʻlda xavfli holatlar yuzaga kelishi hamda turli bidʼat amallar koʻpayishi kuzatilmoqda. 

Taʼkidlanishicha, oxirgi vaqtlarda koʻpchilik ziyoratchilar orasida goʻyoki bu ikki shaharda kabutarlarga taom berilsa, farzandi boʻlmagan odam farzandli boʻladi, degan fikr tarqalgan. 

Ushbu taqiq samarali tarzda amalga oshishi uchun hukumat tomonidan doimiy monitoring dasturlari ishlab chiqildi. Jumladan, shahar koʻchalariga kuzatuv kameralari oʻrnatildi va aholi hamda ziyoratchilarni qonunbuzarlik holatlari haqida xabar berishda faol boʻlishga chaqirilmoqda. 

Fuqarolar huquqbuzarlarning surat yoki videolarini olib, mahalliy politsiyaga dalil sifatida taqdim etishlari mumkin. Bu jarayon jamoat ishtirokiga asoslangan nazorat tizimini shakllantirishi koʻzda tutilmoqda.