Putin Rossiya Qurolli kuchlari shtatini yil boshidan beri to‘rtinchi marta oshirdi

Rossiya Qurolli kuchlaridagi shtat birliklari soni 15 500 taga ko‘paytirildi. Bu Vladimir Putinning 28-sentabrda imzolagan farmonida belgilangan.

Hujjatga ko‘ra, Rossiya armiyasining umumiy shtat tarkibi 2 441 630 kishiga yetkazildi. Shundan 1 550 500 nafari harbiy xizmatchilar hisoblanadi.

Bungacha, iyul oyidagi o‘zgarishdan keyin shtat tarkibi 2 426 130 kishi, harbiy xizmatchilar soni esa 1 535 000 nafarni tashkil etgan.

Bu 2026-yil boshidan beri Rossiya Qurolli kuchlari shtatini oshirish bo‘yicha to‘rtinchi qaror bo‘ldi. Ukrainadagi urush boshlanganidan beri esa armiya soni yettinchi marta ko‘paytirildi.

Yil davomida harbiy xizmatchilar soni bir necha bosqichda oshirildi. Iyul oyi oxirida shtat 25 ming harbiy xizmatchiga ko‘paytirilgan. 12-iyunda esa harbiy xizmatchilar soni 1,51 millionga yetkazilgan.

Putinning yangi farmonida Rossiya hukumatiga Mudofaa vazirligi uchun zarur budjet mablag‘larini ajratish vazifasi ham yuklatilgan.

2026-yil budjetiga mudofaa sohasi uchun 12,9 trillion rubl ajratish rejalashtirilgan. 2027-yil budjet loyihasida esa bu xarajatlarni 17,1 trillion rublga yetkazish ko‘zda tutilgan.