Mirzaobod tumani sobiq hokimi jinoiy jazoga tortildi

Mirzaobod tumani sobiq hokimi Jonibek Yariyev jinoiy jazoga tortildi. Kun.uz sud hujjatlari bilan tanishdi.

Sudning hukmiga koʻra, tumanga 2020-2023 yillarda hokimlik qilgan Jonibek Yariyev mansab vakolatini suiisteʼmol qilgan. U Sardoba suv omborida yuzaga kelgan toshqindan soʻng yashash joyidan ayrilgan oilalar uchun qurilgan uylarni bir nechta holatda belgilangan talablarga zid ravishda berib yuborgan. Bu orqali davlat va jamiyat manfaatlariga juda koʻp miqdorda zarar yetkazgan.

Xalq deputatlari Mirzaobod tuman kengashining 2020 yil 3 noyabrdagi qarori bilan Sardoba suv ombori toʻgʻonidan suv toshishi oqibatida jabr koʻrgan oilalar uchun 2020 yil davomida qurilgan koʻp qavatli uy-joylarni topshirish tartibi tasdiqlangan. Unga koʻra, uy-joyi buzilgan yoki yashab boʻlmaydigan holatga kelgan oilalarga uy-joy taqsimlash bilan bogʻliq hujjatlarni oʻrganish natijalari boʻyicha yakuniy qaror mahalliy kengashi tomonidan qabul qilinishi belgilab qoʻyilgan. Biroq sobiq hokim va oʻsha paytda mahalliy kengash raisi boʻlgan Jonibek Yariyev uy-joyga egalik qilish huquqini beruvchi davlat orderisiz hamda kengash qarorisiz oʻnga yaqin holatda uylarni berib yuborgan.

Jumladan, Sardoba tumani Yurtdosh mahallasida yashagan fuqaro N.A.ga uning uy-joylari yaroqli deb topilgani sababli xalq deputatlari Sardoba tuman kengashining qarori bilan uy-joy berilishi rad etilgan. Ammo Jonibek Yariyev unga uy-joyi buzilgan yoki yashab boʻlmaydigan holatga kelgan oilalar uchun qurilgan xonadonlardan birini bergan.

Bundan tashqari, uy-joy taqsimlashda buzilgan yoki yashab boʻlmaydigan holatga kelib qolgan uyda nechta oila yashaganidan qatʼiy nazar, har bir uy-joy kadastriga muvofiq bitta uy berilishi belgilangan. Ammo sobiq hokim ushbu talabni ham buzgan. Shuningdek, texnogen ofat oqibatida zarar yetgan uyi toʻliq taʼmirlab berilgan fuqarolarga ham yangi qurilgan koʻp qavatli uylardan xonadon ajratib bergan.

Jonibek Yariyev JIB Xovos tuman sudi hukmi bilan Jinoyat kodeksining 205-moddasi (hokimiyat yoki mansab vakolatini suiisteʼmol qilish) 2-qismi “a” bandi hamda 209-moddasi (mansab soxtakorligi) 2-qismi “a” bandida nazarda tutilgan jinoyatni sodir qilishda aybli deb topilgan. Unga 2 yil davlat ishtirokidagi korxona, tashkilot, muassasalarda mansabdorlik va moddiy javobgarlik lavozimlarida ishlash huquqidan mahrum qilib, ish haqining 20 foizini davlat davlat daromadi hisobiga ushlab qolgan holda 2,5 yil axloq tuzatish ishlari jazosi tayinlangan. Shuningdek, sobiq hokimga BHMning 105 baravari miqdorida jarima jazosi ham qoʻllangan.

Sirdaryo viloyat sudi jinoyat ishlari boʻyicha sudlov hayʼati kassatsiya instansiyasining 2025 yil 17 oktabrdagi ajrimi bilan dastlabki sud hukmi oʻzgarishsiz qoldirilgan.

Maʼlumot uchun, 2020 yil noyabr oyida Mirzaobod tumaniga yangi hokim tayinlangandi. 2023 yil oktabr oyida lavozimidan ozod etilgan va uning oʻrnini Sarvar Sultonov egallagan.