Nogironlikni belgilashda yangi tartib joriy etildi: vaqt ham, mablagʻ ham tejaladi

Ilgari vrachlik maslahat komissiyasi bir bemor hujjatini koʻrib chiqish uchun 40–45 minut sarflagan boʻlsa, endilikda avtomat shakllanadigan maʼlumotlar soni 6 tadan 33 tagacha oshirilib, jarayon uchun ketadigan vaqt 2 soatdan 20–25 daqiqagacha qisqardi.

Shuningdek, avvallari bemor kasallikka bevosita aloqasi boʻlmagan koʻplab tekshiruvlardan oʻtishiga toʻgʻri kelardi. Masalan, oyoq amputatsiyasiga duchor boʻlgan bemordan bioximik tahlil, qon va peshob umumiy tekshiruvi, EKG, rentgen hamda terapevt, nevrolog, xirurg va travmatolog xulosasi talab etilardi. Buning oʻzi bemorga oʻrtacha 400–500 ming soʻm xarajat tushardi.

Yangi tartibga koʻra, bemorlarni tekshirish mezonlari ishlab chiqildi va endi ular faqat standartda koʻrsatilgan tekshiruvlardan bepul oʻtadi.