Olimpiada kundaligi: Ikki sportchi final yoʻllanmasini qoʻlga kiritdi

Dastlab yengil vaznda final yoʻllanmasi uchun ringga bir necha karra Osiyo hamda jahon chempioni, Rio Olimpiadasi gʻolibi Hasanboy Doʻsmatov Kabo-Verde vakili Daniel de Pina bilan jang olib bordi. Biroz qiyin kechgan bahsda Hasanboy Doʻsmatov ballar hisobiga raqibini magʻlub etib, final yoʻllanmasini qoʻlga kiritdi. Finalda unga mezbon sportchi Billal Bennama raqib boʻladi.

Keyingi jangda esa final yoʻllanmasini qoʻlga kiritish uchun iqtidorli bokschi Lazizbek Mullajonov va Tojikiston vakili Davlat Boltayev ringga koʻtarildi. Murosasiz kechgan jangda hakamlar 3:2 hisobida bellashuvni oʻzbekistonlik bokschi foydasiga hal qildi. Lazizbek Mullajonovning final jangi 10 avgust kuni kelib chiqishi asli kubalik boʻlgan, hozirda Ozarbayjon sharafini himoya qilib kelayotgan Loren Berto Alfonso Dominguezga qarshi boʻlib oʻtadi.

Maʼlumot uchun, bugun yunon-rum kurashi boʻyicha -60 kg vazn toifasida Islom Bahromov oʻz yurishini boshlaydi. Parij-2024 Olimpiadasida oʻzbekistonlik sportchilar hozircha uchta medal jamgʻargan holda umumiy reytingda 31-oʻrinda ketmoqda. AQSh delegatsiyasi jami 71 ta medal bilan hamon yetakchilikni saqlab turibdi.