Orolboʻyida suv boshqaruvi loyihasi boshlandi

Tashabbus Oʻzbekiston hukumati tomonidan BMT Taraqqiyot dasturi bilan hamkorlikda va Yaponiya hukumati moliyaviy koʻmagida amalga oshiriladi.

Loyihaning umumiy byudjeti 4,6 million dollarni tashkil etadi. U samarali va shaffof suv boshqaruvini yoʻlga qoʻyish, irrigatsiya infratuzilmasini modernizatsiya qilish, GIS kabi raqamli monitoring tizimlarini joriy etish, shuningdek suv tejamkor va iqlimga chidamli texnologiyalarni qoʻllashni nazarda tutadi.

Kegeyli, Chimboy, Qoraoʻzak va Boʻzatov tumanlaridagi mingdan ortiq fermer va xonadonlar zamonaviy yechimlardan foydalanish imkoniga ega boʻladi. Bu esa mahsuldorlik va oziq-ovqat xavfsizligini oshirishga xizmat qiladi.

Tashabbus doirasida institutsional salohiyatni mustahkamlash, gender tengligini ilgari surish va mintaqaviy hamkorlikni rivojlantirish ham koʻzda tutilgan. Muloqot platformalari, axborot kampaniyalari va tajriba almashinuvi orqali barqaror va integratsiyalashgan suv boshqaruvi modellarini yaratish rejalashtirilgan. 

Ushbu tajribani keyinchalik mamlakat boʻylab kengaytirish va Orolboʻyi hududining boshqa qismlarida qoʻllash mumkin boʻladi.