Ozarbayjon rahbari nega Oʻzbekistonga keldi?

Kecha, 22 avgust kuni Ozarbayjon rahbari oʻtirgan samolyot Toshkent xalqaro aeroportiga kelib qoʻndi. Uni Bosh vazir Abdulla Aripov hamda boshqa davlat mulozimlari kutib oldi. Shundan soʻng, Ilhom Aliyev Toshkent shahrida joylashgan Haydar Aliyev yodgorligi majmuasiga borib, haykal poyiga gul qoʻydi. Keyin Bosh vazir Aripov qardosh davlat rahbarini "Yangi Oʻzbekiston" bogʻiga taklif qildi. Aliyev u yerda ham Mustaqillik monumenti poyiga gulchambar qoʻydi. Shu bilan tashrifning birinchi kuni oʻz nihoyasiga yetdi. 

Bugun, 23 avgust kuni Koʻksaroy qarorgohida Ozarbayjon rahbarini tantanali kutib olish marosimi boʻlib oʻtdi. Prezidentlar Koʻksaroy qarorgohida tor doiradagi uchrashuv va davlatlararo oliy kengashning birinchi majlisi oʻtkazilgan. Uchrashuvda hamkorlik masalalari muhokama qilindi. Xususan, tovar ayirboshlash hajmini bir necha barobarga oshirish, sanoat kooperatsiyasining yangi bosqichiga oʻtish boʻyicha vazifalar belgilangan. Bundan tashqari, umumiy qiymati 2 milliard dollardan ziyod loyihalar portfeli shakllantirilgan. Muzokaralar davomida 2025 yilda Oʻzbekiston va Ozarbayjon oʻrtasida diplomatik munosabatlar oʻrnatilganining 30 yilligi nishonlanishi rejalashtirilayotgani bildirildi. 

Shuningdek, Mirziyoyev qardosh kasbdoshiga ushbu sanani keng nishonlash maqsadida tadbirlar dasturi, bir yilga moʻljallangan idoralararo muloqot va almashinuvlar rejasini tayyorlashni taklif etdi. Shu bilan birga tumanlararo aviaqatnovlar sonini oshirish, yer usti va havo transporti boʻyicha tartib-taomillarni yengillashtirish, raqamli yechimlarni joriy etishga ham kelishib olindi. 2025 yilga moʻljallangan navbatdagi hududlar forumini Qoʻqon shahrida oʻtkazish belgilandi. 

Davlat rahbarlari madaniyat va sanʼat, taʼlim, sogʻliqni saqlash, yoshlar va axborot siyosati, sport sohalarida amalga oshirayotgan qator kelishuvlarni davom ettirishni ham maqsad qildi. Shuningdek, Prezidentlarning farmonlari bilan taniqli madaniyat arboblari — Farruh Zokirov va Poʻlat Bulbul oʻgʻliga mamlakatlarda "Xalq artisti" unvoni berilgani mamnuniyat bilan esga olindi. Yigʻilish yakunida esa Prezidentlar erishgan kelishuvlarni oʻz vaqtida amalga oshirish boʻyicha "yoʻl xaritasi"ni belgiladi. 

Davlat rahbarlarining Koʻksaroydagi muzokaralari tugaganidan soʻng, davlatlararo oliy kengashning birinchi majlisi boʻldi. Unda Shavkat Mirziyoyev va Ilhom Aliyev Ittifoqchilik munosabatlari toʻgʻrisidagi shartnomani imzoladi. Prezidentlar quyidagi hujjatlar imzolandi: 

— Mehnat faoliyati va fuqarolarning huquqlarini himoya qilish toʻgʻrisida hukumatlararo bitim; 
— Tashqi ishlar vazirliklari oʻrtasida 2025-2026 yillarga moʻljallangan hamkorlik dasturi; 
— Savdo-iqtisodiy va investitsiyaviy hamkorlikni yanada kengaytirish boʻyicha amaliy harakatlar rejasi; 
— Maktabgacha taʼlim, kasb-hunar taʼlimi, oʻrta maxsus, oliy taʼlim va ilm-fan sohasidagi hamkorlik toʻgʻrisida bayonnomalar; 
— 2024-2026 yillarga moʻljallangan madaniy-gumanitar hamkorlik boʻyicha "yoʻl xaritasi"; 
— 2024-2026 yillarga moʻljallangan turizm sohasidagi harakatlar rejasi; 
— Oʻzbekiston Respublikasi Adliya vazirligi va Ozarbayjon Respublikasi Prezidenti huzuridagi Fuqarolarga xizmat koʻrsatish va ijtimoiy innovatsiyalar davlat agentligi oʻrtasida 2024-2026 yillarga moʻljallangan hamkorlik dasturi; 
— Oʻzbekiston Respublikasi Adliya vazirligi huzuridagi Huquqshunoslar malakasini oshirish markazi va Ozarbayjon Respublikasi Adliya vazirligi Adliya akademiyasi oʻrtasida hamkorlik toʻgʻrisida bayonnoma; 
— Oʻzbekiston Respublikasi Milliy gvardiyasi va Ozarbayjon Respublikasi Ichki ishlar vazirligi oʻrtasida hamkorlik toʻgʻrisida bitim; 
— Sud ekspertizasi markazlari oʻrtasida hamkorlik toʻgʻrisida bayonnoma.

Shundan soʻng, davlat rahbarlari ommaviy axborot vositalari vakillari bilan uchrashuv oʻtkazdi. Tadbirda Prezidentlar oʻtkazgan muzokaralar yuzasidan oʻz fikrlarini bildirdi. 

"Ozarbayjon bizning muhim strategik hamkorimiz va ittifoqchimizdir. Bizni mushtarak tarixiy ildizlarimiz va asrlik doʻstligimiz, yagona din, oʻxshash madaniyat va anʼanalar bogʻlab turadi. Bularning barchasi har tomonlama hamkorlikni chuqurlashtirish uchun ishonchli poydevor boʻlib xizmat qilmoqda", deydi Oʻzbekiston rahbari. 

Shuningdek, tadbirda Ozarbayjonning PASHA Holding, SOCAR, SOFAZ, Agalarov Development, Silk Way Group, Matanat, Sarda Group, AzerGold, Azermash, Ozarbayjon investitsiya xoldingi, "Ozarbayjon temir yoʻllari", "Alyat" erkin iqtisodiy zonasi va boshqa yetakchi kompaniyalarining rahbarlari hamda vakillari ishtirok etdi. Prezident ishbilarmonlarni samimiy qutlab, ularning mamlakatlar oʻrtasidagi savdo-iqtisodiy sheriklikni kengaytirishdagi muhim oʻrni borligini alohida eʼtirof etdi.

 "Sizlar innovatsiyalarni dadillik bilan joriy etib, korxonalar va ish oʻrinlarini yaratib, iqtisodiyotning harakatlantiruvchi kuchi boʻlayapsiz", deydi ularga qarata Shavkat Mirziyoyev. 

Shu tariqa ikki mamlakat rahbarlarining rasmiy uchrashuvlari oʻz nihoyasiga yetmoqda.