Озарбайжон раҳбари нега Ўзбекистонга келди?

Кеча, 22 август куни Озарбайжон раҳбари ўтирган самолёт Тошкент халқаро аэропортига келиб қўнди. Уни Бош вазир Абдулла Арипов ҳамда бошқа давлат мулозимлари кутиб олди. Шундан сўнг, Илҳом Алиев Тошкент шаҳрида жойлашган Ҳайдар Алиев ёдгорлиги мажмуасига бориб, ҳайкал пойига гул қўйди. Кейин Бош вазир Арипов қардош давлат раҳбарини "Янги Ўзбекистон" боғига таклиф қилди. Алиев у ерда ҳам Мустақиллик монументи пойига гулчамбар қўйди. Шу билан ташрифнинг биринчи куни ўз ниҳоясига етди. 

Бугун, 23 август куни Кўксарой қароргоҳида Озарбайжон раҳбарини тантанали кутиб олиш маросими бўлиб ўтди. Президентлар Кўксарой қароргоҳида тор доирадаги учрашув ва давлатлараро олий кенгашнинг биринчи мажлиси ўтказилган. Учрашувда ҳамкорлик масалалари муҳокама қилинди. Хусусан, товар айирбошлаш ҳажмини бир неча баробарга ошириш, саноат кооперациясининг янги босқичига ўтиш бўйича вазифалар белгиланган. Бундан ташқари, умумий қиймати 2 миллиард доллардан зиёд лойиҳалар портфельи шакллантирилган. Музокаралар давомида 2025 йилда Ўзбекистон ва Озарбайжон ўртасида дипломатик муносабатлар ўрнатилганининг 30 йиллиги нишонланиши режалаштирилаётгани билдирилди. 

Шунингдек, Мирзиёев қардош касбдошига ушбу санани кенг нишонлаш мақсадида тадбирлар дастури, бир йилга мўлжалланган идоралараро мулоқот ва алмашинувлар режасини тайёрлашни таклиф этди. Шу билан бирга туманлараро авиақатновлар сонини ошириш, ер усти ва ҳаво транспорти бўйича тартиб-таомилларни енгиллаштириш, рақамли ечимларни жорий этишга ҳам келишиб олинди. 2025 йилга мўлжалланган навбатдаги ҳудудлар форумини Қўқон шаҳрида ўтказиш белгиланди. 

Давлат раҳбарлари маданият ва санъат, таълим, соғлиқни сақлаш, ёшлар ва ахборот сиёсати, спорт соҳаларида амалга ошираётган қатор келишувларни давом эттиришни ҳам мақсад қилди. Шунингдек, Президентларнинг фармонлари билан таниқли маданият арбоблари — Фарруҳ Зокиров ва Пўлат Булбул ўғлига мамлакатларда "Халқ артисти" унвони берилгани мамнуният билан эсга олинди. Йиғилиш якунида эса Президентлар эришган келишувларни ўз вақтида амалга ошириш бўйича "йўл харитаси"ни белгилади. 

Давлат раҳбарларининг Кўксаройдаги музокаралари тугаганидан сўнг, давлатлараро олий кенгашнинг биринчи мажлиси бўлди. Унда Шавкат Мирзиёев ва Илҳом Алиев Иттифоқчилик муносабатлари тўғрисидаги шартномани имзолади. Президентлар қуйидаги ҳужжатлар имзоланди: 

— Меҳнат фаолияти ва фуқароларнинг ҳуқуқларини ҳимоя қилиш тўғрисида ҳукуматлараро битим; 
— Ташқи ишлар вазирликлари ўртасида 2025-2026 йилларга мўлжалланган ҳамкорлик дастури; 
— Савдо-иқтисодий ва инвестициявий ҳамкорликни янада кенгайтириш бўйича амалий ҳаракатлар режаси; 
— Мактабгача таълим, касб-ҳунар таълими, ўрта махсус, олий таълим ва илм-фан соҳасидаги ҳамкорлик тўғрисида баённомалар; 
— 2024-2026 йилларга мўлжалланган маданий-гуманитар ҳамкорлик бўйича "йўл харитаси"; 
— 2024-2026 йилларга мўлжалланган туризм соҳасидаги ҳаракатлар режаси; 
— Ўзбекистон Республикаси Адлия вазирлиги ва Озарбайжон Республикаси Президенти ҳузуридаги Фуқароларга хизмат кўрсатиш ва ижтимоий инновациялар давлат агентлиги ўртасида 2024-2026 йилларга мўлжалланган ҳамкорлик дастури; 
— Ўзбекистон Республикаси Адлия вазирлиги ҳузуридаги Ҳуқуқшунослар малакасини ошириш маркази ва Озарбайжон Республикаси Адлия вазирлиги Адлия академияси ўртасида ҳамкорлик тўғрисида баённома; 
— Ўзбекистон Республикаси Миллий гвардияси ва Озарбайжон Республикаси Ички ишлар вазирлиги ўртасида ҳамкорлик тўғрисида битим; 
— Суд экспертизаси марказлари ўртасида ҳамкорлик тўғрисида баённома.

Шундан сўнг, давлат раҳбарлари oммавий ахборот воситалари вакиллари билан учрашув ўтказди. Тадбирда Президентлар ўтказган музокаралар юзасидан ўз фикрларини билдирди. 

"Озарбайжон бизнинг муҳим стратегик ҳамкоримиз ва иттифоқчимиздир. Бизни муштарак тарихий илдизларимиз ва асрлик дўстлигимиз, ягона дин, ўхшаш маданият ва анъаналар боғлаб туради. Буларнинг барчаси ҳар томонлама ҳамкорликни чуқурлаштириш учун ишончли пойдевор бўлиб хизмат қилмоқда", дейди Ўзбекистон раҳбари. 

Шунингдек, тадбирда Озарбайжоннинг PASHA Holding, SOCAR, SOFAZ, Agalarov Development, Silk Way Group, Matanat, Sarda Group, AzerGold, Azermash, Озарбайжон инвестиция холдинги, "Озарбайжон темир йўллари", "Алят" эркин иқтисодий зонаси ва бошқа етакчи компанияларининг раҳбарлари ҳамда вакиллари иштирок этди. Президент ишбилармонларни самимий қутлаб, уларнинг мамлакатлар ўртасидаги савдо-иқтисодий шерикликни кенгайтиришдаги муҳим ўрни борлигини алоҳида эътироф этди.

 "Сизлар инновацияларни дадиллик билан жорий этиб, корхоналар ва иш ўринларини яратиб, иқтисодиётнинг ҳаракатлантирувчи кучи бўлаяпсиз", дейди уларга қарата Шавкат Мирзиёев. 

Шу тариқа икки мамлакат раҳбарларининг расмий учрашувлари ўз ниҳоясига етмоқда.