Oʻzbekiston Afgʻonistonga 15 turdagi 2,7 tonna urugʻlikni yordam sifatida yetkazib berdi

Tashriflar doirasida qishloq xoʻjaligi sohasida hamkorlikni kengaytirish boʻyicha Oʻzbekiston Respublikasi Qishloq xoʻjaligi vazirligi hamda Afgʻoniston Qishloq xoʻjaligi, irrigatsiya va chorvachilik vazirligi bilan bir qator kelishuvlarga amalga oshirilgani aytilmoqda.

Shuningdek, Afgʻoniston hududi turli tuproq-iqlim sharoitlarida qishloq xoʻjaligi ekinlari urugʻliklarni ekib, sinab koʻrish maqsadida Termiz shahridagi "Ayritom" xalqaro chegara oʻtkazish punkti "Hayraton – Mozori Sharif" temir yoʻli orqali 15 turdagi ekinlarning 35 xildagi seleksiya navlaridan iborat 2,7 tonna urugʻliklari tuhfa qilingan.

Qayd etilishicha, urugʻlik  Afgʻoniston Qishloq xoʻjaligi, irrigatsiya va chorvachilik vazirligi Ilmiy tadqiqotlar bosh boshqarmasi boshligʻi doktor Muhammad Rafi Bavari tomonidan qabul qilib olingan.

«Aytish kerak, bugun Afgʻoniston qishloq xoʻjaligi ancha ortda qolgan, buni birgina chigit ekish ishlarini qoʻlda bajarilayotgani misolida koʻrish mumkin. Oʻzbekiston va Afgʻoniston tarixida ilk bor kuzatilayotgan bu hamkorlik, Oʻzbekiston hududida yaratilgan navlarning agrotexnologiyalarini oʻrgatish, paxtachilik yoʻnalishida erishilgan yutuqlar aynan, paxta, gʻalla, sabzavot yetishtiruvchi masʼul fermerlarni biriktirgan holda afgʻon diyori qishloq xoʻjaligini rivojlantirishga koʻmaklashishga qaratilgani bilan ahamiyatli», - deyiladi Qishloq xoʻjaligi vazirligi xabarida.