6 oy ichida 6 mingdan ortiq shaxs shahvoniy shilqimlik va oiladagi zoʻravonlikda ayblanib, sudlandi

Maʼmuriy javobgarlik toʻgʻrisidagi kodeksning 59−2-moddasi (Oiladagi (maishiy) zoʻravonlik) bilan 4952 kishi sudlandi, ularning 3200 nafariga jarima jazosi, 1752 nafariga esa maʼmuriy qamoq jazosi qoʻllanilgan.

Jinoyat kodeksining 126−1-moddasi (Oiladagi (maishiy) zoʻravonlik) bilan 231 nafar shaxs sudlanib, ularning 65 nafariga ozodlikdan mahrum qilish jazosi, 166 nafariga esa ozodlikdan mahrum qilish bilan bogʻliq boʻlmagan jazolar tayinlandi.

Maʼmuriy javobgarlik toʻgʻrisidagi kodeksning 41−1-moddasi (Shahvoniy shilqimlik qilish) bilan 986 nafar shaxs maʼmuriy javobgarlikka tortilib, ularning 358 nafariga jarima jazosi, 628 nafariga esa maʼmuriy qamoq jazosi qoʻllanilgan.

Bundan tashqari, Jinoyat kodeksining 141−3-moddasi (Shaxsning shaʼnini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi maʼlumotlarni oshkor qilish) bilan 99 nafar shaxs sudlanib, ularning 24 nafariga ozodlikdan mahrum qilish jazosi, 75 nafariga esa ozodlikdan mahrum qilish bilan bogʻliq boʻlmagan jazolar tayinlandi.

Eslatib oʻtamiz, 2023 yil 11 aprelda “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimini yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun prezident tomonidan imzolangan edi.