Amerikalik sayyohning Oʻzbekistondan chiqib ketishida muammo yuzaga keldimi?

U oʻzining boshqaruvidagi “Lamborjini” rusumli mashinasida chegaradan oʻtkazilmayotgani haqida gapirgan.

Bojxona qoʻmitasi matbuot xizmatiga koʻra, sayyoh avtomobilining Oʻzbekistonda boʻlish muddatini salkam 2 oyga oʻtkazib yuborgan. Shu boisdan avtotransport vositasini olib chiqishga taqiq qoʻyilgan.

“Bir necha daqiqalar oldin u belgilangan tartibida 23 mln 72 ming soʻm miqdoridagi yigʻimni toʻladi va maʼmuriy javobgarlikdan ozod etildi. Xorijiy shaxs oʻzining avtotransport vositasida Oʻzbekistondan kuzatib qoʻyildi”, — deyiladi Bojxona qoʻmitasi xabarida.

Maʼlum boʻlishicha, xorijlik sayyoh shu yilning 2 may kuni Oʻzbekistonga kirib kelgan. Oʻzbekiston qonunchiligiga binoan xorijiy mamlakat fuqarolari avtotransport vositalari bilan Oʻzbekistonda 90 kun emin-erkin harakatlanishi mumkin. AQSh fuqarosi 2 avgust kuni chiqib ketishi kerak boʻlgan lekin u sentabr oyining oxirida chiqib ketishga harakat qilgan.

“Xorijiy shaxs bevosita bank shoxobchasiga borgan holda valyuta almashtirish va pul naqd qilish kabi bank amaliyotlarini dam olish kunlarida amalga oshira olmagani sababli mazkur jarayonni bugun yakuniga yetkazdi”, — deyiladi qoʻmita xabarida.