Bojxonadan qariyb 6 mlrd soʻmlik zargarlik buyumlarini olib oʻtmoqchi boʻlganlar ushlandi

Qayd etilishicha, viloyat bojxona punkti orqali harakatlanayotgan fuqarolardan biri xolislar ishtirokida tekshirilganda fuqaroning ichki kiyimlari orasidan oyoqlarining yuqori qismiga 19 dona oʻram yashirganligi aniqlangan. 

Mazkur oʻramlar belgilangan tartibda ochib koʻrilganida ularning ichida 9 turdagi 468 dona qimmatbaho metalldan yasalgan va brilliant toshlar bilan bezatilgan zargarlik buyumlari topilgan. 

Bundan tashqari, fuqaro zargarlik buyumlarini yashirincha olib oʻtishda yonidagi 14 yoshli nevarasidan ham foydalanishga uringan. Bola tekshirilganda uning ham ichki kiyimlari orasiga 12 dona oʻram yashirilgani aniqlangan. Mazkur oʻramlarda esa 8 turdagi 454 dona taqinchoqlar borligi maʼlum boʻlgan.

"922 dona tilladan yasalgan brilliant toshlarga oʻrnatilgan zargarlik buyumlarining umumiy ogʻirligi 6,7 kilogrammdan oshmoqda, umumiy qiymati esa 5,6 mlrd soʻmni tashkil qilgan", deyiladi bojxona xabarida.

Maʼlumot uchun, Oʻzbekiston hududiga jismoniy shaxslar tomonidan 65 grammgacha ogʻirlikdagi qimmatbaho metallar va qimmatbaho toshlardan yasalgan zargarlik buyumlarini bojsiz olib kirishga ruxsat etiladi.