Bosh prokuror: 11,2 milliard soʻmlik ish haqi hamda unga tenglashtirilgan toʻlovlar talon-toroj qilingani aniqlandi

Ushbu masala yuzasidan soʻzga chiqqan Bosh prokuror Nigʻmatilla Yoʻldoshev prokuratura organlari tomonidan hisobot yilida ijtimoiy sohadagi qonunchilik ijrosi ustidan nazorat yoʻnalishida aholini ijtimoiy muhofaza qilish, bandligini taʼminlash va ehtiyojmand oilalarni qoʻllab-quvvatlash hamda kambagʻallikni qisqartirish masalalariga alohida eʼtibor qaratilganini taʼkidladi.

– Xususan, 489 nafar fuqaroga 3,8 milliard soʻmlik kechiktirilgan ish haqi va boshqa toʻlovlar undirib berildi, –  dedi N.Yoʻldoshev. – 11,2 milliard soʻmlik ish haqi hamda unga tenglashtirilgan toʻlovlar talon-toroj qilingani aniqlanib, tegishli choralar koʻrildi. Iqtisodiy sohada qonuniylikni mustahkamlash, ayniqsa, investitsiya dasturlari ijrosini soʻzsiz taʼminlash, energiya resurslari talon-toroj qilinishining oldini olish, “yashirin” iqtisodiyot shakllanishining turli usul va kanallarini aniqlash hamda ularga barham berish borasida tizimli ishlar amalga oshirilmoqda. 

Tadbirkorlar va xorijiy investorlarning 29 ming 451 nafariga qonun ustuvorligi, shuningdek, ularning huquqlari, erkinliklari hamda qonuniy manfaatlarini taʼminlash borasida amaliy yordam koʻrsatildi. 

Prokurorlarning sud protsesslaridagi ishtiroki, korrupsiyaga qarshi kurashish borasida koʻrilayotgan choralar, jinoyatchilik va huquqbuzarlikka qarshi kurashish, tergov va tezkor-qidiruv faoliyati boʻyicha amalga oshirilgan ishlarga alohida eʼtibor qaratildi.

Ushbu masala yuzasidan fikr bildirgan Senat Raisi Tanzila Norboyeva bundan bir necha yil muqaddam taʼlim tizimida, davlat xaridlari sohasida korrupsiya darajasi yuqori boʻlganini qayd etdi. Bunga barham berish uchun Korrupsiyaga qarshi kurashish milliy kengashi doirasida Bosh prokuratura bilan hamkorlikda tizimli ishlar amalga oshirilgani natijasida aynan shu yoʻnalishlarda korrupsiya holatlari keskin kamaydi. Bu boradagi ishlarni yanada kuchaytirish va chuqurlashtirish zarur. 

Senatorlarning korrupsiya holatlari haqida xabar berilganda qanday choralar koʻrilishi, xabar bergan shaxslar himoyasi qanday taʼminlanishiga oid savollariga javoban Bosh prokuror bunday holatlarda zudlik bilan zarur choralar koʻrilayotganini maʼlum qildi. Xabar tasdigʻini topganda, aybdorlarga nisbatan jinoyat ishlari qoʻzgʻatilmoqda. Muhimi, bunday xabarlarni prokuratura organlariga yuborish uchun zarur imkoniyatlar yaratilgan. Ishonch telefoni, korrupsiya haqida xabar berishga moʻljallangan botlar ishga tushirilgan. Xabar beruvchilar shaxsi sir tutiladi, himoyasi taʼminlanadi. 

Senatorlar tomonidan prokuratura organlari faoliyatining ayrim yoʻnalishlarida nazoratni yanada kuchaytirish lozimligi taʼkidlandi.

Xususan, aholi sogʻligʻini saqlash, reproduktiv salomatligini asrash, qolaversa, yuqumli kasalliklarning oldini olish borasida oʻtkazilgan nazorat tadbirlari yetarli samara bermagani, onalar oʻlimi soni Qoraqalpogʻiston Respublikasi, Buxoro hamda Xorazm viloyatlarida oshgani tanqid qilindi. 

Jinoyatchilikka qarshi kurashish, mamlakatda kriminogen vaziyat barqarorligini saqlash, tezkor-qidiruv, surishtiruv va dastlabki tergov faoliyatini yuritishda ham kamchiliklar mavjudligi qayd etildi. Jumladan, sodir etilgan 67 mingdan ortiq jinoyatning qariyb

62 foizini oldini olish mumkin boʻlgan jinoyatlar tashkil qilgan.

Bunday jinoyatlarning umumiy jinoyatchilik koʻrsatkichidagi ulushi Fargʻona viloyati va Qoraqalpogʻiston Respublikasida 65 foizga, Namanganda esa qariyb 70 foizga yetgan.

Senatorlar prokuratura organlari tomonidan sogʻliqni saqlash, yuqumli kasalliklarning oldini olish, reproduktiv salomatlikni, onalik va bolalikni muhofaza qilishga oid qonunchilik ijrosi ustidan taʼsirchan nazorat oʻrnatish, yoshlar va xotin-qizlarni har tomonlama qoʻllab-quvvatlash, ekologiya va atrof-muhitni muhofaza qilishga oid qonunchilik hujjatlari ijrosini taʼminlash borasida nazoratni yanada kuchaytirish boʻyicha tavsiyalar berdi. 

Muhokama yakunida Senatning tegishli qarori qabul qilindi.