Davlat ramzlari toʻgʻrisidagi qonunni buzgan fuqaroga jarima tayinlandi

Toshkent shahrida sud Fargʻona viloyatida tugʻilgan 21 yoshli ayolni davlat ramzlari toʻgʻrisidagi qonunchilikni buzgani uchun maʼmuriy javobgarlikka tortdi.

Ish materiallariga koʻra, 2004 yilda tugʻilgan fuqaro Sh. 2025 yil 28 oktabr kuni Filippinning Manila shahrida boʻlib oʻtgan «Miss Earth — 2025» xalqaro goʻzallik tanlovida ishtirok etgan. Tanlov davomida u Oʻzbekiston Respublikasining davlat bayrogʻi va gerbi tasvirlari tushirilgan libosda sahnaga chiqqan, shuningdek mazkur obrazdagi fotosuratni ijtimoiy tarmoqda joylashtirgan.

Sud majlisida ayblanuvchi aybini qisman tan olgan. Uning soʻzlariga koʻra, kostyum milliy ramzlardan ilhomlanib tayyorlangan. Shu bilan birga, u libosda davlat bayrogʻining ajralmas qismi hisoblangan yarimoy va 12 yulduz tasvirlari mavjud boʻlmaganini taʼkidlagan.

Mirabod tumani jinoyat ishlari boʻyicha sudining 2026 yil 19 yanvardagi qarori bilan fuqaro Maʼmuriy javobgarlik toʻgʻrisidagi kodeksning 203-1-moddasi 1-qismi (davlat ramzlari toʻgʻrisidagi qonunchilikni buzish) asosida aybdor deb topildi.

Sud qaroriga muvofiq, unga ikki bazaviy hisoblash miqdorida — 824 ming soʻm jarima tayinlandi.