DXX hududlarda giyohvandlik hamda kuchli taʼsir qiluvchi dori vositalarining noqonuniy aylanmasiga chek qoʻydi

Maʼlum boʻlishicha, Davlat xavfsizlik xizmati Sirdaryo viloyati boʻyicha boshqarmasi xodimlari tomonidan ichki ishlar organlari bilan hamkorlikda Oqoltin tumanidagi “Sardoba” YPX maskanida tezkor tadbir oʻtkazilgan. Unda “Toshkent-Jizzax” yoʻnalishida harakatlanayotgan Jizzax viloyatining Baxmal tumanida yashovchi, muqaddam sudlangan shaxs boshqaruvidagi “Kobalt” rusumli avtomashina toʻxtatilib, koʻzdan kechirilgan. 

Natijada, avtomashina yukxonasiga 3080 dona “Regapen” nomli kuchli taʼsir qiluvchi dori vositalari yashirib qoʻyilganligi aniqlanib, protsessual tartibda rasmiylashtirib olingan. Mazkur shaxsning jinoiy sherigi boʻlgan – Baxmal tumanida yashovchi fuqaro ham qoʻlga olingan. Aniqlanishicha, ushbu dori vositalari Qirgʻiziston Respublikasidan olib kelingan. 

Shuningdek, DXX xodimlari tomonidan bojxona organlari bilan hamkorlikda Fargʻona shahrida ham tezkor tadbir oʻtkazilgan. Unda Fargʻona tumanida yashovchi, muqaddam sudlangan shaxs Qirgʻizistondan keltirilgan 2799 dona “Regapen” kuchli taʼsir qiluvchi dori vositalarini 65 mln soʻmga sotgan vaqtida ushlangan. 

Fargʻona viloyatida kuzatilgan yana bir holatda, Fargʻona tumanida yashovchi, muqaddam sudlangan shaxs “oʻzbek-qirgʻiz” davlat chegarasida belgilangan tartibni qoʻpol ravishda buzib, Qirgʻizistondan 5600 dona “Regapen” kuchli taʼsir qiluvchi dori vositalarini olib oʻtgan vaqtida ashyoviy dalillar bilan qoʻlga olingan. 

Bundan tashqari, bu yoʻnalishda DXX Xorazm viloyati boʻyicha boshqarmasi xodimlari ham bojxona idoralari bilan hamkorlikda tezkor tadbir oʻtkazgan. 

Unda “Toshkent-Xorazm” yoʻnalishida harakatlanayotgan yuk mashinasi Hazorasp tumanida toʻxtatilib koʻzdan kechirilganida, uning yukxonasidan 1 kg 814 gr “opiy” moddasi topilgan. Ushbu qonunbuzarlik Hazorasp tumanida tugʻilgan fuqaro tomonidan sodir etilganligi aniqlangan. Uning yashash xonadonida ham 158 gr “opiy” va 1 kg 988 gr “gashish” moddalari borligi aniqlangan.

 
“Mazkur shaxsni giyohvandlik vositalari bilan taʼminlab kelgan, Surxondaryo viloyatining Denov tumanida yashovchi, 1989 va 1991 yillarda tugʻilgan 2 nafar fuqaro ham ushlanib, ulardan birining yashash xonadonidan 424 gr “opiy” moddasi olindi. Ushbu holatda narkotik moddalar Tojikiston Respublikasidan olib kelinganligi aniqlandi”, 

deyiladi DXX tomonidan ochiqlangan maʼlumotlarda. 

DXX Andijon viloyati boʻyicha boshqarmasi xodimlari tomonidan Qoʻrgʻontepa tumanida oʻtkazilgan tezkor tadbirda, Andijon shahri tomon harakatlanayotgan “Neksiya” rusumli avtotransport vositasi toʻxtatilib, xolislar ishtirokida koʻzdan kechirilgan. 

Natijada unda yoʻlovchi sifatida ketayotgan 2 nafar fuqaroga tegishli boʻlgan va Qirgʻizistondan keltirilgan 4 kg 861 gr “Pregabalin” nomli kuchli taʼsir qiluvchi modda borligi maʼlum boʻlgan. Soʻngra tezkor tadbir davom ettirilib, ushbu kuchli taʼsir qiluvchi moddalarni qabul qilib olgan vaqtida Andijon shahrida yashovchi shaxs ushlandi. 

Shuningdek, uning tanishlari boʻlgan Shahrixon tumanida istiqomat qiluvchi 2 nafar ayol ham protsessual tartibda ushlanib, ulardan 1 kg 987 gr “Pregabalin” moddasi hamda 1342 dona “Regapen” nomli kuchli taʼsir qiluvi dori vositalari olingan. 

Hozirda barcha holatlar yuzasidan mazkur shaxslarga nisbatan jinoyat ishlari qoʻzgʻatilib, qamoq ehtiyot chorasi qoʻllanilgan.