DXX tomonidan bir guruh firibgarlar ushlandi

Bayon qilinishicha, Davlat xavfsizlik xizmatining Fargʻona viloyati boʻyicha boshqarmasi xodimlari tomonidan ichki ishlar organlari bilan hamkorlikda tezkor tadbir oʻtkazilgan. Unda aniqlanishicha, Uchkoʻprik tumanida yashovchi shaxs oʻzganing tekstil mahsulotlari ishlab chiqarishga ixtisoslashgan MChJga qarashli, Fargʻona shahridagi aksiyadorlik tijorat banklaridan birida garovda turgan 12 sotix yer maydonini 130 ming AQSh dollariga sotishga kelishgan. Firibgar oldindan 109 ming AQSh dollarini olgan vaqtida ashyoviy dalillar bilan birga ushlangan.

Shuningdek, DXXning Samarqand viloyati boʻyicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda yana bir tezkor tadbir boʻlib oʻtgan. Unga koʻra, Urgut tumanida yashovchi fuqaro tumandagi gʻallachilikka ixtisoslashgan fermer xoʻjalikning sugʻoriladigan yer maydonidan 50 sotixini 80 ming AQSh dollariga sotishga kelishgan. U kadastr idoralaridagi tanishlari orqali hujjatlarini rasmiylashtirib berishini aytib, kelishilgan pul mablagʻidan 30 ming AQSh dollarini olgan vaqtida ashyoviy dalillar bilan qoʻlga tushgan.

Bundan tashqari, DXXning Qashqadaryo viloyati boʻyicha boshqarmasi xodimlari tomonidan Iqtisodiy jinoyatlarga qarshi kurashish Departamentining hududiy boshqarmasi bilan hamkorlikda navbatdagi tezkor tadbir oʻtkazildi. Qarshi tumani hokimligining qishloq xoʻjaligi boʻlimi boshligʻi oʻrinbosari chorvachilik yoʻnalishida foydalanish maqsadida fuqaroga tuman hokimligi zaxirasidagi 25 gektar yer maydonini mansabdor tanishlari orqali uning nomiga rasmiylashtirib berish evaziga 10 ming AQSh dollari talab qilgan. Mazkur amaldor shundan 5 ming AQSh dollarini olgan vaqtida ashyoviy dalillar bilan ushlangan.

Hozirda mazkur shaxslarga nisbatan jinoyat ishlari qoʻzgʻatilib, tergov harakatlari olib borilmoqda.