Endi moped va skuter haydovchilari uchun guvohnoma olish tartibi yengillashadi

Bu haqda Vazirlar Mahkamasining “Transport vositalarini boshqarish tizimini yanada takomillashtirish chora-tadbirlari toʻgʻrisida”gi qarorida belgilandi.

Qarorga koʻra, 2026 yildan boshlab «A1» toifadagi guvohnomani olish uchun talabgorlar:

• haydovchilarni tayyorlash boʻyicha majburiy oʻquv kursini oʻtamasdan;

• toʻgʻridan-toʻgʻri nazariy va amaliy imtihonlarni topshirish orqali guvohnoma olish huquqiga ega boʻladi.

Shu bilan birga, nomzodlar xohishiga koʻra onlayn yoki oflayn oʻquv kurslarida qatnashishi yoxud mustaqil tayyorlanishi mumkin.

Haydovchilik guvohnomasini olish uchun oʻqishni tugatganlik haqidagi guvohnoma talab etilmaydi.

Shuningdek, “A”, “B”, “C”, “D” toifali haydovchilik guvohnomasiga ega shaxslar avtomatik ravishda «A1» toifadagi transport vositalarini ham boshqarish huquqiga ega boʻladi.

Imtihon tartibi

• Nazariy imtihonda 20 ta savol beriladi;

• 16 tadan kamida toʻgʻri javob bergan nomzodlar amaliy imtihonga qoʻyiladi (boshqa toifalar uchun — 18 ta savol talab qilinadi).

Yana bir muhim yangiliklar:

• 2026 yil 1 fevraldan “A” va “B” toifasi uchun nazariy qismni mustaqil oʻzlashtirish mumkin boʻladi;

• “A” va “B” toifali haydovchilarni tayyorlash kurslarini Davlat yoʻl harakati xavfsizligi xizmatida roʻyxatdan oʻtkazish tartibi bekor qilinadi;

• 2026 yil 1 apreldan avtomatlashtirilgan foto va video qayd etish tizimlari orqali aniqlangan qoidabuzarliklar uchun jarima ballari qoʻllaniladi;

• jarima ballari transport vositasining egasi yoki undan ishonchnoma, sugʻurta polisi yoki yoʻl varaqasi asosida foydalanuvchi haydovchilar oʻrtasida taqsimlanadi.

 Bu oʻzgarishlar mototransport vositalari harakatini qonuniylashtirish, xavfsizlikni oshirish va haydovchilarga qulaylik yaratishga qaratilgan.