Giyohvand modda olib kirayotgan guruh qoʻlga olindi

Xorazmda “Xavfsiz va sogʻlom yurt” tadbirining ikkinchi bosqichi doirasida huquq-tartibot organlari tomonidan olib borilgan profilaktika ishlari oʻz samarasini bermoqda.

Tadbir davomida fosh etilgan giyohvandlik vositalarining noqonuniy muomalasi bilan bogʻliq bir qator jinoyatlar yuzasidan olib borilgan dastlabki tezkor surishtiruvlar jarayonida Xorazm viloyati hududiga giyohvandlik vositalari asosan Samarqand tumanining Urgut tumanida yashovchi bir guruh shaxslar tomonidan yetkazib berilayotganligi aniqlandi.

Shundan keyin viloyat IIB va DXX viloyat boshqarmasi tomonidan oʻzaro hamkorlikda tuzilgan tezkor tadbir asosida Xorazm viloyati IIB tezkor xodimlaridan bir guruhi Samarqand viloyatiga yuborildi. Ushbu xodimlar Urgut tumanida istiqomat qilib kelayotgan giyohfurushlar bilan muloqotga kirishishga erishgan. Ulardan nazorat tartibida yirik miqdordagi giyohvandlik vositalarini sotib olish rejasi ishlab chiqildi.

Mazkur rejaga asosan, joriy yilning 25 iyul kuni Samarqand viloyatining Toyloq tumanida tezkor tadbir oʻtkazildi. Unda Urgut tumanida yashovchi, 1961 yilda va 1965 yilda tugʻilgan ikki nafar shaxs oldindan oʻzaro jinoiy til biriktirib juda koʻp miqdordagi yaʼni 2 kilogramm 50 gramm “opiy” giyohvandlik vositasini nazorat ostida yuborilgan xaridorga 20 ming AQSh dollariga qonunga xilof ravishda sotayotgan paytda tezkor xodimlar tomonidan ashyoviy dalillar bilan jinoyat ustida qoʻlga olindi.

Mazkur holat yuzasidan Xorazm viloyati IIB huzuridagi Tergov boshqarmasi tomonidan Jinoyat kodeksining 273-moddasi 5-qismi bilan jinoyat ishi qoʻzgʻatilib, dastlabki tergov harakatlari olib borilmoqda.

Gumonlanuvchilar ehtiyot chorasi sifatida qamoqqa olindi.