“Green Talks” — ekologik madaniyatni rivojlantirishga qaratilgan yangi loyiha

Oʻzbekiston Ekologik partiyasi markaziy kengashi ijroiya qoʻmitasida Yoshlar parlamenti aʼzolari ishtirokida uchrashuv boʻlib oʻtdi. Yigʻilish davomida ekologik madaniyat hamda jamoatchilik ishtirokini oshirishga xizmat qiluvchi yangi tashabbus — “Green Talks” loyihasi taqdim etildi.

Mazkur loyiha yoshlarga ekologik muammolar haqida erkin fikr almashish, dolzarb masalalarni muhokama qilish va takliflar ishlab chiqish imkonini beruvchi ochiq muloqot maydoni boʻlishi kutilmoqda.

Uchrashuvda ishtirok etgan partiya rahbari Abdushukur Hamzayev loyiha gʻoyasini toʻliq qoʻllab-quvvatlab, uni yoshlar va deputatlar muloqotining samarali platformasi sifatida eʼtirof etdi.

Ekopartiyaning parlamentdagi yoshlar guruhi aʼzolari tashabbusi bilan ilgari surilayotgan “Green Talks” loyihasi aholi orasida ekologik madaniyatni rivojlantirish hamda barqaror taraqqiyot gʻoyalarini keng targʻib etishga xizmat qiladi. Ekologik muammolar taʼsirini yumshatishda jamoatchilik ishtirokini kengaytirishga zamin boʻladi.