Indoneziya aviakompaniyalariga Oʻzbekistonning barcha xalqaro aeroportlariga parvoz qilish huquqi berildi

Qayd etilishicha, prezidentning 2023 yil 11 sentabrdagi farmoni bilan tasdiqlangan “Oʻzbekiston — 2030” strategiyasiga muvofiq 2030 yilga qadar aviaqatnovlar hajmini toʻrt barobarga oshirish belgilangan. Mazkur topshiriq ijrosi doirasida Transport vazirligi delegatsiyasining navbatdagi uchrashuvi Indoneziyaning Jakarta shahrida boʻlib oʻtdi. Uchrashuvda Oʻzbekiston va Indoneziya aviatsiya hukumatlari oʻrtasida ikki tomonlama hamkorlik va havo qatnovlarini yanada rivojlantirish masalalari muhokama etildi.

Foto: Transport vazirligi

Uchrashuv davomida Indoneziya tomoniga Oʻzbekistonda “Ziyorat turizmi” hamda fuqaro aviatsiya sohasida amalga oshirilayotgan keng koʻlamli islohotlar haqida batafsil maʼlumot berildi. Shuningdek, Indoneziya aviakompaniyalari vakillari bilan oʻtkazilgan alohida uchrashuvlarda “Umra plyus” dasturini rivojlantirish bilan bogʻliq jihatlar koʻrib chiqildi.

Muzokaralar yakuniga koʻra aviatsiya hukumatlari oʻrtasida tegishli hujjatlar imzolandi va quyidagi kelishuvlarga erishildi:

• ·       havo qatnovi toʻgʻrisidagi ikki tomonlama bitimda aviakompaniyalar soniga qoʻyilgan cheklovlarni bekor qilish va mazkur shartni aviatsiya hukumatlarining vakolati asosida kuchga kiritish boʻyicha zudlik bilan kelishuv imzolash;
• ·       havo qatnovi toʻgʻrisidagi ikki tomonlama bitimga kiritilgan oʻzgarishlarni esa oʻrnatilgan tartibda amaldagi qonunchilik talablari asosida ikki davlat ichki kelishuvlar jarayonlarini amalga oshirish yoki diplomatik notalar almashinuvi orqali qabul qilish, unga qadar parvozlarni ikki davlat aviatsiya hukumatlari oʻrtasida imzolangan yangi kelishuv doirasida amalga oshirish;
• ·       Oʻzbekiston tomonidan tayinlangan aviakompaniyalar uchun bitimdagi Jakarta shahriga qoʻshimcha ravishda aholi qatlami zich joylashgan eng yirik turistik va sanoatlashgan Denpasar, Surabaya, Medan, Yogyakarta, Majalengka, Banda Asex, Tanjung Pandan, Lombok va qoʻshimcha istalgan ikkita shaharlarni parvoz manzili etib belgilash;
• ·       Indoneziya tomonidan tayinlangan aviakompaniyalari uchun Oʻzbekistonning barcha xalqaro aeroportlariga parvoz qilish huquqini berish;
• ·       “Oʻzbekiston havo yoʻllari” MAK va Indoneziya aviatsiya hukumati oʻrtasida 1995 yilda imzolangan “Kelishuv” shartlariga muvofiq barcha turdagi aviaqatnovlar uchun haftasiga 3 marta etib belgilangan chastotalarni yangi kelishuv asosida har bir tomon aviakompaniyalari uchun 28 taga oshirish (jami 56 ta) ularni yarmini yoʻlovchi va qolgan yarmini yuk tashish uchun belgilash;
• ·       barcha aviakompaniyalar uchun aviaqatnovlarni havo kemasining yoʻlovchi va yuk sigʻimi boʻyicha cheklovlarsiz parvozlarni amalga oshirishiga ruxsat berish;

• ·       Yuqorida qayd etilgan aviakompaniya va aviatsiya hukumati oʻrtasida 1995 yilda imzolangan kelishuvni bekor qilish va barcha parvozlarni yangi kelishuv shartlari asosida amalga oshirish;

     Denpasar yoʻnalishida amalga oshiriladigan aviaqatnovlarning 50 foizini Code Share asosida amalga oshirish;

•    yuk tashish aviaqatnovlari uchun har ikki tomon aviakompaniyalariga uchinchi, toʻrtinchi va beshinchi havo erkinliklarini berish;
•    kelgusida aviaqatnovlar hajmini oshirish hamda qoʻshimcha aviakompaniyalarni tayinlash masalalarini oʻzaro xat almashish yoʻli bilan hal etish.
•  

Foto: Transport vazirligi

Vazirlik xabarida taʼkidlanishicha, erishilgan kelishuvlar kelgusida ikki davlat oʻrtasida aviaqatnovlarni bajaruvchi aviakompaniyalar sonini koʻpaytirish, “Umra plyus” dasturini amalga oshirish orqali Ziyorat turizmini rivojlantirish, aviaqatnovlarda har ikki tomonlama yoʻlovchi va yuk tashish hajmlarini oshirish, turistlarning erkin harakatlanishi hamda ikki tomonlama savdo-iqtisodiy munosabatlarning yanada rivojlanishiga katta turtki boʻlib xizmat qiladi.