Issiq suv hisoblagichini “orqaga qaytarish” taklifi: tizimli muammo bormi?

2026 yil 18 fevral kuni Toshkent shahri tumanlaridan biridagi ofisda isitish va issiq suv hisoblagichi koʻrsatkichlarini yangilash jarayonida noodatiy holat yuz bergan. Mijoz koʻrsatkichlarni suratga olib, operatorga taqdim etgan va kvitansiya rasmiylashtirilgan.

Shundan soʻng ofis xodimlaridan biri mijozga “yordam” taklif qilgan. Uning aytishicha, toʻlov summasini yarmigacha kamaytirish mumkin, buning uchun esa “uyga xodimlar borib, hisoblagichni orqaga aylantirib beradi”. Evaziga kvitansiyadagi summaning yarmini toʻlash taklif etilgan. Mijoz bu taklifni rad etgan.

Kompaniya bilan rasmiy munosabat olish maqsadida koll-markazga murojaat qilindi. Koll-markazning 8-operatori matbuot xizmati aloqalarini taqdim etmadi, elektron pochta manzili ham berilmadi. 17-operator esa kompaniyaga murojaat uchun rasmiy elektron pochta manzili hozircha saytda joylashtirilmaganini maʼlum qildi. Uning aytishicha, bu maʼlumotni saytga qoʻshish taklifi rahbariyatga yetkaziladi.

Shuningdek, operator hisoblagich koʻrsatkichlarini telefon orqali ham taqdim etish mumkinligini bildirdi. Biroq bu tartib rasmiy manbalarda aniq va ochiq shaklda koʻrsatilmagan.

Paradigma muxbiri bilan suhbatda operator kompaniya tizimiga kirish hozircha faqat ofisga borib, operator orqali parol olish yoʻli bilan amalga oshirilishini ham tasdiqladi.

Ayni paytda kompaniya onlayn tizim orqali xizmat koʻrsatilayotganini bildirgan boʻlsa-da, amalda mustaqil roʻyxatdan oʻtish imkoni cheklangan. Mijoz avval ofisga borib, operator orqali parol olishi kerak, shundan keyingina Telegram-bot yoki shaxsiy kabinetdan foydalanish mumkin.

Bu tartibni Paradigma.uz jurnalisti bilan telefon orqali suhbatda kompaniya koll-markazi operatori ham tasdiqladi. Uning aytishicha, hozircha tizimga kirish faqat ofis orqali parol olish yoʻli bilan amalga oshirilmoqda.

Masala yuzasidan mutasaddilardan rasmiy munosabat kutilmoqda.