Koʻcha nomi va uy raqamlari koʻrsatkichini oʻrnatish tartibi belgilandi

Hukumat qarori (475-son, 30.07.2025 y.) bilan “Koʻcha nomi va koʻchmas mulk obʼekti raqami koʻrsatkichini oʻrnatish tartibi toʻgʻrisida”gi nizom tasdiqlandi. 

Nizom koʻcha nomi va koʻchmas mulk obʼekti raqami koʻrsatkichlarining shakli, oʻlchamlari hamda ularni tayyorlash va oʻrnatish tartibini belgilaydi.

Koʻrsatkichning namunaviy shakllari quyidagi toifalarga ajratiladi:

1-toifa – poliyetilentereftalat, poliyetilintereftalatglikol, polistirol yoki polikarbonat materialdan tayyorlangan, yoritish moslamali koʻrsatkich;

2-toifa – kompozit alyuminiy materialidan tayyorlangan, nur qaytaruvchi qoplamali koʻrsatkich;

3-toifa – kompozit alyuminiy materialidan tayyorlangan koʻrsatkich.

Bunda, qoida tariqasida, 1-toifa koʻrsatkichlar shahar ahamiyatidagi magistral koʻchalar, 2-toifa koʻrsatkichlar tuman ahamiyatidagi magistral koʻchalar va 3-toifa koʻrsatkichlar esa mahalliy ahamiyatga ega koʻchalarda oʻrnatiladi.

Koʻrsatkichda koʻchaning nomi qisqartirilishiga yoʻl qoʻyilmaydi.