Koʻngilli boʻlib Rossiya tomonidan urushga kirgan oʻzbekistonlik qamaldi

Joriy yil 24 sentabr kuni JIB Gʻallaorol tuman sudida koʻrib chiqilgan mazkur «ish»da aniqlanishicha, Jinoyat kodeksining 154-moddasi 1-qismi va 227-moddasi 2- qismi «a» bandi bilan ayblangan B.M. ishlab pul topish maqsadida 2023 yilning may oyida Rossiyaga borgan.

U yerda turli mavsumiy ishlarda ishlab kelib, RF Samara viloyati Tolyatti tumanidagi harbiy qismda Ukraina urushiga borish haqidagi shartnomani tuzgan va 2023 yil 10 iyundan 2024 yil 11 iyunga qadar oddiy askar unvonida Rossiya tomonidan Ukrainaning vaqtincha bosib olingan Lugansk va Donetsk viloyatlari hududidagi harbiy harakatlarda ishtirok etgan.

Shundan soʻng, B.M. harbiy harakatlardagi ishtirokini yashirish maqsadida Jizzax viloyati Baxmal tumani IIB tomonidan berilgan «qizil pasport»ini qasddan yirtib tashlagan va ichki ishlar organlari hamda Oʻzbekistonning xorijdagi konsullik va elchixona muassasalariga fuqarolikdan chiqish boʻyicha murojaat qilmasdan, RF fuqaroligini olgan.

Sud tergovida maʼlum boʻlishicha, B.M. 2024 yil 12 iyuldan 2025 yil 9 fevral kuniga qadar Moskvada qurilish ishlarida ishlagan, biroq qurilish ishlari yaxshi boʻlmaganligi sababli yana 2025 yil 10 fevral kuni Rossiya MV bilan qayta shartnoma tuzgan.

2025 yil 20 mart kuni esa tishi ogʻrib, Moskva shahridagi harbiy gospitalga borgan va u yerda 18 aprelga qadar davolangan. Shundan soʻng Oʻzbekistonga qaytishni maqsad qilib, 19 aprel kuni Moskva-Samarqand yoʻnalishida aviachipta xarid qilib, ertasi kuni Samarqandga yetib kelgan. Shundan soʻng uni huquqni muhofaza qilish xodimlari ushlagan.

Sud B.M.ni Jinoyat kodeksining yuqorida koʻrsatilgan moddalari boʻyicha aybdor deb topdi va JKning 57-moddasini qoʻllab, 3 (uch) yil muddatga ozodlikdan mahrum qilish jazosini tayinladi.

Maʼlumot uchun, B.M. Oʻzbekistondagi harbiy xizmatni oʻtab, 2010-2018 yillarda bir nechta harbiy qismlarda ishlab kelgan.