Litsenziyasiz faoliyat yuritayotgan klinikalar aniqlandi

Maʼlumotlarga koʻra, joriy yilning 6 oktabr kuni prezidentning “Isteʼmolchilar huquqlarini samarali himoya qilishni tashkil etish chora-tadbirlari toʻgʻrisida”gi PQ–296-son qarori qabul qilingan boʻlib, unda fuqarolar huquqlarini himoya qilish tizimini takomillashtirish, davlat va nodavlat tashkilotlar oʻrtasida samarali hamkorlikni yoʻlga qoʻyish hamda jamoatchilik nazoratini kuchaytirish vazifalari belgilangan.

Shu asosda Raqobat qoʻmitasi nodavlat notijorat tashkilotlar bilan hamkorlikda xususiy tibbiyot muassasalarida isteʼmolchilar huquqlariga rioya etilishini oʻrgandi. Tekshiruvlar jami 7 284 ta xususiy tibbiyot tashkilotini qamrab oldi, bu umumiy soning 85 foizini tashkil etadi.

Oʻrganish natijasida quyidagi holatlar aniqlangan:

27,4 foiz klinikalar (2000 ta) koʻrsatilgan manzilda faoliyat yuritmayapti;

3 foizida (235 ta) peshlavhalar mavjud emas;

47 foizida (3 428 ta) tashqi reklama obʼektlari joylashtirilgan;

20 foizida (1 460 ta) axborotlar davlat tilida berilmagan;

61,5 foizida (4 483 ta) xizmat narxnomalari koʻrsatilmagan.

Bundan tashqari, ayrim klinikalar litsenziyada koʻrsatilmagan faoliyat turlari bilan shugʻullanayotgani aniqlandi.

Jumladan:

Samarqand viloyatida — 1 ta;

Surxondaryo viloyatida — 2 ta;

Toshkent viloyatida — 5 ta;

Fargʻona viloyatida — 2 ta klinika shunday holatda faoliyat yuritgani maʼlum boʻldi.

Aniqlangan holatlar boʻyicha materiallar belgilangan tartibda mutasaddi idoralarga yuborildi.

Raqobat qoʻmitasi nodavlat notijorat tashkilotlar faoliyatini qoʻllab-quvvatlash, jamoatchilik nazoratini kuchaytirish hamda isteʼmolchilar huquqlarini himoya qilish boʻyicha ishlar izchil davom ettirilishini maʼlum qildi.