Markaziy Bank plastik kartadan noqonuniy pul yechib olinishi yuzasidan munosabat bildirdi

9 dekabr holatiga koʻra, Humans mobil ilovasi orqali Octagram AJ tomonidan amalga oshirilayotgan barcha toʻlov xizmatlari vaqtincha toʻxtatilgan.

Uzcard va Humo kartalari orqali amalga oshiriladigan toʻlov va oʻtkazmalar odatiy tartibda ishlamoqda. Shuningdek, kartalardan boshqa bank va toʻlov tashkilotlari ilovalari orqali foydalanish imkoniyati ham saqlanib qolgan.

Markaziy bank xabarida taʼkidlanishicha, ayni paytda barcha shubhali tranzaksiyalar, texnik jarayonlar va platformalar oʻrtasidagi oʻzaro hamkorlik toʻliq oʻrganilmoqda. Tekshiruv yakunlari boʻyicha qoʻshimcha rasmiy maʼlumot taqdim etilishi maʼlum qilindi.

Shuningdek, Markaziy bank mazkur holat boʻyicha fuqarolar belgilangan tartibda huquqni muhofaza qiluvchi organlarga murojaat qilishlari mumkinligini bildirdi.

Maʼlumot oʻrnida, 2025 yil yozida Octobank Humans’ni sudga berib, undan 500 milliard soʻm moliyaviy zarar undirish boʻyicha sudda yutgan edi. “Oʻzbektelekom” kompaniyasi ham Humans’ning katta miqdorda qarzdorligi mavjudligini maʼlum qilgan va shu munosabat bilan sudga daʼvo kiritgan.