Noqonuniy “mayning ferma” faoliyatiga chek quyildi

Andijon viloyati Buloqboshi tumani "Shirmonbuloq" mahallasida yashovchi fuqaro O.P.ning noqonuniy “mayning” faoliyati bilan shugʻullangani aniqlandi.

Oʻtkazilgan tezkor tadbirlarga koʻra, fuqaro O.P. oʻz jinoiy sheriklari bilan oldindan til biriktirib, xonadonida 5 ta toʻplamdagi kripto-aktivlari qurilmalarini oʻrnatgan va ularni tijorat maqsadida ishlatgan. Mazkur qurilmalar umumiy foydalanishdagi elektr tarmogʻiga ruxsatsiz ulangan boʻlib, natijada 157,9 million soʻmlik elektr energiyasidan noqonuniy foydalanilgani aniqlangan.

Bosh prokuratura huzuridagi Departamentning Buloqboshi tuman boʻlimi, Davlat xavfsizlik xizmati va Ichki ishlar boʻlimi xodimlari hamkorligida oʻtkazilgan tezkor tadbir natijasida ushbu mayning ferma faoliyati fosh etildi.

Mazkur holat yuzasidan Jinoyat kodeksining 169-moddasi (“Oʻgʻrilik”) va 278-9-moddasi (“Mayning faoliyatini qonunga xilof ravishda amalga oshirish”) bilan jinoyat ishi qoʻzgʻatilib, tergov harakatlari olib borilmoqda.