Olotdagi katta oʻgʻrilik ortidan ikki oʻsmir qoʻlga olindi

 Buxoro viloyatining Olot tumanida sodir etilgan oʻgʻirlik fosh etildi. Bu haqda «Xabar.uz»ga viloyat IIB axborot xizmati maʼlum qildi.

Taʼkidlanishicha, tumanning Maʼrifat mahallasida yashovchi xonadon egasi uyida boʻlmagan paytda nomaʼlum shaxslar uning uyiga yashirincha kirib, katta miqdordagi pul mablagʻlarini oʻgʻirlab ketishgan.

Tergov maʼlumotlariga koʻra, jinoyatchilar yotoqxonadagi shkafdan 50 million soʻm, 3 000 AQSh dollari, 295 yevro hamda 120 000 Rossiya rublini oʻgʻirlab, hodisa joyidan qochib ketishgan.

Olib borilgan tezkor-qidiruv va texnik harakatlar natijasida Eski Olot va Dilkor mahallalarida yashovchi ikki nafar oʻsmir (2008 y.t.) gumonlanuvchi sifatida qoʻlga olinib, ozirda ularga nisbatan qonuniy choralar koʻrilmoqda.

Ushbu shaxslarning boshqa shunday turdagi, hali fosh etilmagan jinoyatlarga ham aloqadorligi mavjudligi yuzasidan qoʻshimcha tergov harakatlari davom ettirilmoqda.

Maʼlumot oʻrnida: Jinoyat kodeksining 169-moddasiga koʻra, oʻgʻrilik — oʻzganing mulkini yashirincha oʻgʻirlab olish jinoiy jazoga sabab boʻladi. Agar bu jinoyat bir guruh shaxslar tomonidan oldindan til biriktirib, sodir etilgan boʻlsa, jazo yanada ogʻirlashadi.