Prezident Namanganda tashkil etilgan parvarish markazi bilan tanishdi

Mamlakat Konstitutsiyasi, aholini ijtimoiy himoya qilish strategiyasi asosida insonni qadrlash koʻlami kengaydi, bu sohadagi xizmatlar ehtiyojmandlarga yaqinlashtirilmoqda. Xususan, shu yil mart oyidan boshlab Oʻzbekistonda nogironligi boʻlgan bolalar uchun kunduzgi parvarish xizmati yoʻlga qoʻyildi. Bunday loyihalar xususiy sheriklik asosida, davlat tomonidan subsidiya orqali amalga oshirilmoqda.

Tadbirkor Sayyora Qosimova tomonidan tashkil etilgan “Firdavs” kunduzgi parvarish markazi ulardan biri. Markaz 36 oʻringa moʻljallangan boʻlib, maxsus taʼlim va reabilitatsiya xizmatlari koʻrsatiladi. Bolalar kun davomida toʻqqiz soatlik individual oʻquv-trening dasturlari bilan qamrab olinadi. Mashgʻulotlarni malakali nevropatolog, defektolog, surdolog, audiolog, pedagog va psixologlar olib boradi.

Bu xizmatdan foydalanayotgan onalar farzandlariga mehri va gʻamxoʻrligi uchun Prezidentimizga minnatdorlik bildirdi. Ularning aytishicha, oldinlari bunday bolalar faqat uyda oʻtirar, jamiyatdan ajralib qolardi. Yangi ijtimoiy himoya tizimi tufayli endi ular ham “yorugʻlikka” chiqyapti. Nogironligi bor bolalar inklyuziv taʼlimga, qiziqarli dars va mashgʻulotlarga jalb etilib, hayotiy koʻnikmalarni oʻrganyapti. Bu nogiron farzandi bor oilalar uchun juda katta madad va taskindir.

Prezident yurtimizda hech kim eʼtibordan chetda qolmasligi, bunday ijtimoiy loyihalar miqyosi kengaytirilishini taʼkidladi.

Davlat rahbari shu yerdagi “Faol hayotga qadam besh xizmat” masʼuliyati cheklangan jamiyati faoliyati bilan ham tanishdi.

Markaz shu yil tadbirkor Xosiyat Ortiqovaning shaxsiy mablagʻi hisobidan tashkil etilgan. Bu yerda oʻzgalar parvarishiga muhtoj shaxslar uchun zamonaviy qulayliklar, tibbiy va reabilitatsiya xizmatlari yoʻlga qoʻyilgan. Markaz 16 oʻringa moʻljallangan.

Bu yerda tibbiy mutaxassislar tomonidan individual dasturlar asosida har kuni 8 soatlik mashgʻulot oʻtkaziladi. Ular insonlarning sogʻligʻini tiklash, funksional imkoniyatlarini oshirish va ijtimoiy hayotga qaytarishga yordam beradi.

Muhimi, oʻtgan davr mobaynida amalga oshirilgan muolajalar samara bera boshladi. Xususan, sakkiz nafar shaxsning oʻz-oʻziga xizmat qilish darajasi yaxshilandi, besh nafarining oila aʼzosi ishga joylashdi.

“Faol hayotga qadam” dasturi va kunduzgi parvarish insonlarga sogʻlom hayotga qaytish, oilalarga esa iqtisodiy va ijtimoiy imkoniyatlarni oshirish imkonini bermoqda. Bu xizmatlar orqali faqatgina bemorlar hayotida emas, balki ularning oilalarida, jamiyatda ijobiy oʻzgarishlar kuzatilmoqda.

Mazkur sohadagi davlat-xususiy sheriklik dasturiga respublika boʻyicha 600 nafar tadbirkor qoʻshilgan boʻlib, ularning 46 nafari Namangan viloyatida faoliyat yuritmoqda. “Faol hayotga qadam” dasturi bilan yurtimizdagi oʻzgalar parvarishiga muhtoj 24 ming fuqaro, kunduzgi parvarish xizmati bilan 3 mingga yaqin nogironligi boʻlgan bolalar qamrab olingan.