Rossiya OAVlari Mirziyoyev samolyotini “AQSh harbiy samalyoti” deb talqin qildi

Ayrim nashrlar samalyotni “harbiy samolyot” yoki “AQSh HHK samolyoti” boʻlishi mumkin, deya taxminlarni ilgari surgan.

Flightradar maʼlumotlariga asoslangan xabarlarda samolyot Vashington yaqinidagi Endryus aviabazasidan uchgani, Murmansk viloyati ustidan Rossiya havo hududiga kirgani va maʼlum bir vaqtdan soʻng kuzatuvdan yoʻqolgani aytilgan. Baʼzi manbalar esa samolyot Qozogʻiston chegarasi tomon yoʻl olganini yozgan.

Maʼlum boʻlishicha, shov-shuvga sabab boʻlgan layner Oʻzbekiston Prezidenti Shavkat Mirziyoyevning rasmiy samolyoti boʻlgan. Davlat rahbari AQShga tashrifidan soʻng “Tinchlik kengashi”ning birinchi sammitida ishtirok etib, Toshkentga qaytgan.

Hukumat va maxsus reyslar haqidagi maʼlumotlar ochiq kuzatuv servislarida doim ham toʻliq aks etmaydi. Ochiq manbalarga koʻra, samolyot Vashingtondan Toshkent vaqti bilan 00:12 da uchib chiqqan va Kanada, Grenlandiya, Yevropa davlatlari, Rossiya hamda Qozogʻiston ustidan parvoz qilib, 12:14 da Toshkentga yetib kelgan.