Samarqandda 1 milliard 200 million dollarlik 14 ta yangi loyiha shakllantirilgan

Davlat rahbariga 30 iyul kuni Samarqand viloyatida islohotlar natijadorligi va yangi rejalar yuzasidan axborot berildi.

Soʻnggi sakkiz yilda Samarqand viloyatida 1 ming 132 ta koʻp qavatli uy qurilib, 56 ming oilaning turmush sharoiti yaxshilangan. Maktabgacha taʼlim qamrovi 21 foizdan 73 foizga, oliy taʼlimda 10 foizdan 45 foizga yetgan.

Iqtisodiyotda toʻqimachilik, metallurgiya, elektr texnikasi, qurilish materiallari, turizm jadal rivojlanmoqda. Bunyodkorlik, yirik loyihalar va yuqori daromadli ish oʻrinlari aholining ertangi kunga ishonchini oshirmoqda.

Viloyatda kambagʻallik darajasi yil boshidan beri 7,5 foizdan 6,4 foizga kamaygan. Yil yakunigacha 150 ming odamni ishga joylab, 90 ming aholini kambagʻallikdan chiqarish maqsad qilingan.

Oʻtgan sakkiz yilda hududda sanoat mahsulotlari 1,7 barobar oʻsib, hozir 45 trillion soʻmdan oshgan. Lekin bu natijalarning 37 foizi Samarqand shahriga, 23 foizi Jomboy, Samarqand va Urgut tumanlariga toʻgʻri keladi. Qoʻshrabot, Payariq va Nurobodda sanoat nisbatan rivojlanmagan.

Davlat rahbarining tashabbusiga muvofiq, Samarqand viloyatida ham “Islohotlar shtabi” tuzildi. Taqdimotda tadbirkorlarning takliflari asosida ishlab chiqilgan yangi loyihalar haqida axborot berildi.

Masalan, Nurobod tumanida 115 gektarda maxsus sanoat zonasi tashkil qilish taklif etilmoqda. U yerda 472 million dollarlik investitsiya loyihalari amalga oshirilib, 1 ming 200 ta ish oʻrni yaratiladi. Qoʻshrabot tumanida xitoylik investorning 40 million dollar toʻgʻridan-toʻgʻri sarmoyasi hisobiga granit toshini qazib olish va qayta ishlash moʻljallangan.

Bulungʻurlik tadbirkor “in vitro” laboratoriya tashkil etib, kartoshka urugʻi boʻyicha brend yaratishga kirishgan. Tumanda 100 million dollarlik biofarmatsevtika korxonasini ishga tushirish ham rejalashtirilgan.

Umuman, viloyatda 1 milliard 200 million dollarlik 14 ta yangi loyiha shakllantirilgan. Ularning natijasida 12 ming ish oʻrni, 82 million dollarlik eksport imkoniyati ochilishi koʻzda tutilgan.

Prezident bu tashabbuslarni qoʻllab-quvvatlab, loyihalarni jadallashtirish boʻyicha koʻrsatmalar berdi. Har bir tuman-shaharning investitsion jozibadorligi va eksport imkoniyatlarini tengma-teng oshirish zarurligi taʼkidlandi.