Samarqanddagi xalqaro festivalda 7 tonna palov pishiriladi

2025 yilning 1-3 avgust kunlari Samarqandda oʻzbek oshxonasini ommalashtirish va madaniy aloqalarni mustahkamlashga qaratilgan birinchi xalqaro “Samarqand palovi” festivali boʻlib oʻtadi. Butun dunyoga katta pazandalik shousi koʻrinishida taqdim etiladigan milliy taom – Samarqand paloviga alohida eʼtibor qaratilmoqda.

Festivalning asosiy voqeasi 200 dan ortiq oshpaz ishtirokida 7 tonna palovning tayyorlanishi boʻladi. Bu voqea 3 avgust kuni “Abadiy shahar” sayyohlik majmuasida boʻlib oʻtadi va haqiqiy rekordga aylanishi kutilmoqda.

Festival dasturiga quyidagilar kiradi:

1 avgust – Sulton Xovand beka (Ashratxona) maqbarasi hududida ochilish, oshpazlik tanlovlari va mahalliy retseptlar taqdimoti;

2 avgust – Alisher Navoiy koʻchasida xorijiy oshpazlar ishtirokida xalqaro festival kuni, mahorat darslari va degustatsiyalar;

3 avgust – palov tayyorlash boʻyicha pazandalik rekordi va xayriya tadbiri.

Uch kun davomida mehmonlar hunarmandchilik yarmarkalari, sharqona shirinliklar koʻrgazmalari, madaniy tadbir va konsert dasturlarini tomosha qilishadi. Tayyorlangan palov Mehribonlik uylari, maktab-internatlar va qariyalar uylariga topshiriladi.

Samarqand palovi festivali mintaqaning tashrif qogʻozi va Oʻzbekiston uchun yangi gastronomik brendga aylanishi moʻljallangan.