Sardoba  fojiasiga  toʻrt yil toʻldi

Bugun ushbu fojeaga 4 yil toʻldi. Sardoba fojeasi 2020 yil koronavirus infeksiyasi avj olgan paytda boʻlgan edi. Suv ostida qolgan mahallalar aholisi dastlab yaqin-atrofdagi mahallalarga joylashtirilgan boʻlsa, keyinchalik u yerlarni ham suv bosgani tufayli Jizzax viloyatining Doʻstlik, Paxtakor, Zarbdor va Mirzachoʻl tumanlaridagi maktab, kollej va aholi xonadonlariga, ayrimlar esa Sirdaryoning boshqa shahar va tumanlariga koʻchirila boshlandi. Umumiy hisobda 90 mingga yaqin aholi evakuatsiya qilingan edi.

Sardoba fojeasi sabab 10ta mahalla fuqarolar yigʻini, 23ta aholi punkti, hududlardagi 4711ta turar va 277ta noturar joy obektlariga hamda 30 718 gektar ekin maydonlariga zarar yetkazgan. Toshqindan talafot koʻrgan 4351ta xonadonning 2570tasi yaroqsiz holga kelgan, 1781tasiga qisman zararlangan.

Toshqin tufayli Sardoba, Mirzaobod va Oqoltin tumanlarining jami 32 381 gektar maydonlari talafot koʻrgan. Shundan 549 gektari aholi tomorqa ekin maydonlari hisoblanadi.

19 592 gektar yer maydonida qishloq xoʻjaligi ekinlari suv ostida qolib talafot koʻrgan. 108 ta fermer va qishloq xoʻjalik korxonasining jami 16,525 gektar yeri zararlangan. 9734 gektar chigit, 6821 gektar gʻalla, 231 gektar sabzavot ekinlari, 1095 gektar poliz, 14 gektar kartoshka, 154 gektar bogʻ va 83 gektar bogʻ oralariga ekilgan sabzavot ekinlari suv ostida qolib, yaroqsiz holatga kelgan.Qishloq xoʻjaligiga yetgan talafotni qoplash uchun davlat budjetidan jami 9,5 mlrd soʻm ajratilgandi.

Hodisa oqibatlarini bartaraf etish, jabrlanganlar va ularning oila aʼzolariga moddiy yordam koʻrsatish uchun respublika budjetidan dastlabki yordam sifatida 100 mlrd soʻm ajratildi. Keyinroq toshqindan jabrlangan 4,5 mingdan ortiq oilaga yana 40 million soʻmdan berilgan.

Rasmiy maʼlumotlarga koʻra, fojia oqibatida 6 kishi (2 nafar ayol, 4 nafar erkak) halok boʻlgan, bir kishi bedarak yoʻqolgan. Jumladan, aholini xabardor qilish va qutqaruv ishlarini olib borish jarayonida Milliy gvardiyaning 3 nafar xodimini kuchli suv oqimi olib ketgan. Ulardan biri qutqarilgan, biri halok boʻlgan, yana biri bedarak yoʻqolgan deb topilgan.